ՄԱԿ-ի Անվտանգության խորհուրդը 8-րդ հանդիպումը կանցկացնի Ուկրաինայի իրադրության շուրջ

ՄԱԿ-ի Անվտանգության խորհուրդը մարտի 19-ին այս ամսվա սկզբից ի վեր ութերորդ հանդիպումը կանցկացնի Ուկրաինայի իրադրության շուրջ: Ինչպես հայտարարել է մարտին ԱԽ-ն նահագահող Լյուքսեմբուրգի մշտական ներկայացուցչությունը, նիստը նշանակված է ժամը 15:00-ին (Երևանի ժամանակով՝ ժամը 23:00-ին):

«Անվտանգության խորհուրդը բաց հանդիպում կանցկացնի Ուկրաինայի իրադրության շուրջ: Հաշվետվությամբ հանդես կգան ՄԱԿ-ի գլխավոր քարտուղարի տեղակալ Յան Էլիասոնը և գլխավոր քարտուղարի՝ մարդու իրավունքների հարցերով օգնական Իվան Շիմոնովիչը»,- հայտնել են ներկայացուցչությունում:

Նաև հայտնի է դարձել, որ Գլխավոր ասամբելայի՝ մարտի 20-ին նշանակված լիագումար նիստը հետաձգվել է անորոշ ժամանակով: Այդ մասին տեղեկացրել է ԳԱ-ի նախագահի պաշտոնական ներկայացուցիչ Աֆաֆ Կոնջան:

Նշենք, որ Ռուսաստանը մարտի 15-ին վետո է դրել ՄԱԿ-ի ԱԽ-ում բանաձևի ընդունման վրա, որը անօրինական էր ճանաչում Ղրիմի հանրաքվեն: 

ԵԱՀԿ-ի գործող նախագահ, Շվեյցարիայի նախագահ և արտաքին գործերի նախարար Դիդիե Բուրկհալտերը հայտարարել է, որ թեև Ղրիմի կարգավիճակի հարցում Ռուսաստանի գործողությունները, իր կարծիքով, միջազգային իրավունքի և ԵԱՀԿ-ի պարտավորությունների խախտում են, այդ իրադարձությունները չպետք է հանգեցնեն իրադրությունը դիվանագիտական ճանապարհով կարգավորելու փորձերից վերջնական հրաժարման:

Իր հերթին ՆԱՏՕ-ի գլխավոր քարտուղար Անդերս Ֆոգ Ռասմուսենը հայտարարել է, որ Հյուսիսատլանտյան դաշինքը չի ճանաչում Ղրիմի միացումը Ռուսաստանին: