Ղրիմը Ռուսաստանի կազմ ընդունելու մասին պայմանագիրը համապատասխանում է ՌԴ-ի Սահմանադրությանը. ՍԴ

Ղրիմը Ռուսաստանի կազմ ընդունելու մասին պայմանագիրը համապատասխանում է ՌԴ-ի Սահմանադրությանը: Նախօրյակին ստորագրված փաստաթղթի վերաբերյալ մարտի 19-ին այս եզրակացությունն է կայացրել ՌԴ-ի Սահմանադրական դատարանը: Այս մասին հայտնում է itar-tass-ը:

«Սահմանադրական դատարանը ճանաչել է, որ այս Պայմանագիրը համապատասխանում է Ռուսաստանի Դաշնության Սահմանադրությանը»,-հայտարարել է Սահմանադրական դատարանի ղեկավար Վալերի Զորկինը:

Ռուսաստանը և Ղրիմը մարտի 18-ին Մոսկվայում պայմանագիր են ստորագրել ՌԴ-ի կազմ Ղրիմի Հանրապետության և Սևաստոպոլ քաղաքի մտնելու մասին: Պայմանագիրն ստորագրել են ՌԴ-ի նախագահ Վլադիմիր Պուտինը, Ղրիմի Գերագույն խորհրդի ղեկավար Վլադիմիր Կոնստանտինովը, հանրապետության վարչապետ Սերգեյ Ակսյոնովը և Սևաստոպոլի քաղաքային խորհրդի նախագահ Ալեքսեյ Չալին:

Մինչդեռ Ուկրաինայի արտաքին գործերի նախարարությունը հանրապետությունում ՌԴ-ի գործերի ժամանակավոր հավատարմատար Անդրեյ Վորոբյովին բողոքի նոտա է հանձնել Ռուսաստանի կողմից Ղրիմի Հանրապետության ճանաչման և ՌԴ-ի կազմ Ղրիմի Հանրապետության ու Սևաստոպոլի ընդունման մասին պայմանագրի ստորագրման կապակցությամբ:

«Ռուսական կողմի այդ գործողությունները չեն համապատասխանում պետությունների տարածքային ամբողջականության, սահմանների անձեռնմխելիության և անխախտելիության և ներքին գործերին չմիջամտելու երաշխիքների վերաբերյալ միջազգային իրավունքի սկզբունքներին ու նորմերին»,-ասված է հաղորդագրության մեջ: