Էրդողանը Ալիևից պահանջել է Ադրբեջանում վերացնել նուրսիստների ցանցը

Թուրքիայի վարչապետ Էրդողանը զանգահարել է Ադրբեջանի նախագահ Իլհամ Ալիևին և պահանջել ամբողջությամբ վերացնել Ադրբեջանում գործող նուրսիստների ցանցը: Այս մասին հայտնում է qafqazinfo.az լրատվական կայքը:

Էրդողանը շնորհակալություն է հայտնել Ալիևին Ադրբեջանում նորսիստների ցանցը բացահայտելու և նախագահի աշխատակազմի քաղաքական վերլուծությունների և տեղեկատվական ապահովման բաժնի ղեկավար Էլնուր Ասլանովին աշխատանքից հեռացնելու համար, ում մեղադրում են արդի իսլամի գաղափարախոս Ֆեթուլլահ Գյուլենի նուրսիստական շարժմանը ծառայելու և «նուրսիստների իմամ» լինելու մեջ:

Էրդողանի խոսքով` Ֆեթուլլահ Գյուլենի «Հիզմեթ» կազմակերպությունը օրինական թուրքական կառավարության վրա իր հարձակումներում լայնորեն օգտագործել է Ադրբեջանում ստեղծած իր ցանցի հնարավորությունները:

«Ադրբեջանական նուրսիստների ցանցի ֆինանսական միջոցների հաշվին Թուրքիայում մի քանի արդյունավետ ոչ կառավարական կազմակերպություններ, հետազոտական կենտրոններ, մեդիա-կառույցներ և անգամ մեկ համալսարան է ստեղծվել: Այդ կենտրոնները գործում են Ադրբեջանի պետական ընկերությունների, Երիտասարդության և սպորտի նախարարության ֆինանսական, ինչպես նաև Ադրբեջանի նախագահին կից Ռազմավարական հետազոտությունների կենտրոնի գիտական աջակցությամբ: Այդ կառույցներն աջակցում են «Հիզմեթ» կազմակերպությանը, ազդեցություն գործում հասարակական կարծիքի վրա և ուղղորդում թուրքական կառավարության դեմ», -ասել է Էրդողանը: Թուրքիայի վարչապետը հատուկ նշել է այդ ուղղությամբ Կասպյան ռազմավարական ինստիտուտի (HASEN) գործունեությունը:

Ալիեւի հետ հեռախոսազրույցում Էրդողանը նաև նշել է, որ թուրքական հատուկ ծառայությունները պատրաստել են Ադրբեջանի կառավարությունում նուրսիստների, ինչպես նաեւ նրանց կողմից Թուրքիայում ֆինանսավորվող կազմակերպությունների ցուցակը, և ասել, որ այդ տվյալները Ադրբեջանի նախագահի աշխատակազմ կներկայցվեն մոտ ժամանակներս:

Էրդողանը կարեւորել է Էլնուր Ասլանովին պաշտոնանկ անելով սկսված` նուրսիստների չեզոքացման գործընթացի շարունակումը: Նա նաև նշել է, որ «Էլնուր Ասլանովի հովանավորը դեռևս իշխանության մեջ է»:

«Էլնուր Ասլանովը, գտնվելով Ադրբեջանի կառավարությունում, կատարել է նուրսիստների հրամանները: Սակայն այն ուժը, որ կանգնած է եղել նրա հետեւում, դեռևս չեզոքացված չէ: Նուրսիստների ցանցի ամբողջությամբ վերացումը հնարավոր կդառնա միայն այդ ուժի և պետական կառույցներում, հասարակական կազմակերպություններում և ԶԼՄ-ներում նրա բազմաթիվ կողմնակիցների չեզոքացումից հետո», -ասել է Էրդողանը: