«Ուկրաինայի իրադարձությունները կարող են փոխել ՆԱՏՕ-ի մոտեցումը նոր անդամների ընդունման հարցում». Ռասմուսեն

Ուկրանիայի իրադարձությունները կարող են փոփոխությունների հանգեցնել նոր անդամների ընդունման և միջուկային զինաթափման նկատմամբ ՆԱՏՕ-ի մոտեցումներում: Այս մասին հայտարարել է Հյուսիսատլանտյան դաշինքի գլխավոր քարտուղար Անդերս Ֆոգ Ռասմուսենը:

Վաշինգտոնում ելույթ ունենալով Բրուքինգսի քաղաքագիտական ինստիտուտում՝ նա հիշեցրել է, որ ներկայումս ՆԱՏՕ-ին ակտիվորեն միանալ են ձգտում չորս երկրներ՝ Բոսնիան և Հերցեգովինան, Մակեդոնիան, Չեռնոգորիան և Վրաստանը: Առաջիկա գագաթնաժողովի փաստաթղթերում, «անշուշտ», կարտացոլվի այն առաջընթացը, որին նրանք հասել են անդամակցմանը նախապատրաստվելու գործընթացում», ասել է գլխավոր քարտուղարը:

Միևնույն ժամանակ նշել է, որ «ՆԱՏՕ-ի «բաց դռների» քաղաքականության վրա կարող են ազդել նաև Ուկրաինայի իրադարձությունները»: Թե դա ինչ կոնկրետ փոփոխություններ կարող է առաջացնել դաշինքի ընդլայնման գործընթացում, Ռասմուսենը չի ճշտել:

Նա նաև համոզված է, որ ուկրաինական իրադարձությունները ՆԱՏՕ-ի երկրներին կդրդեն մեծացնել իրենց ռազմական բյուջեները: «Ուկրաինայի ճգնաժամին պետք է հետևի պաշտպանության բնագավառում Եվրոպայի ներդրումների ընդլայնումը»,- ասել է դաշինքի գլխավոր քարտուղարը: