Օբաման մարտի 26-ին Բրյուսելում ՆԱՏՕ-ի խորհրդի անդամների հետ հանդիպմանը կքննարկի Ղրիմի իրադրությունը

Ինչպես հայտնում է itar-tass-ը, ԱՄՆ-ի նախագահ Բարաք Օբաման մարտի 26-ին Բրյուսել մեկօրյա այցի շրջանակներում հանդիպում կունենա ՆԱՏՕ-ի գլխավոր քարտուղար Անդերս ֆոգ Ռասմուսենի և Հյուսիսատլանտյան խորհրդի անդամների հետ: Այդ մասին ՌՏԼ հեռուստառադիոընկերության եթերում հայտնել է Բելգիայում ԱՄՆ-ի գործերի հավատարմատար Մարկ Ստորելլան:

Դիտորդներն ակնկալում են, որ ՆԱՏՕ-ի կենտրոնակայան այցելության ընթացքում Օբաման կազմակերպության գծով ԱՄՆ-ի դաշնակիցների հետ կքննարկի Ղրիմի շուրջ ստեղծված իրադրությունը:

Բելգիայի մայրաքաղաք նախագահի այցի գլխավոր նպատակը ԱՄՆ-ԵՄ բարձր մակարդակի հանդիպումն անցկացնելն է, որի ընթացքում, ինչպես սպասվում է, կարծարծվեն Ռուսաստանի հետ Արևմուտքի հարաբերությունները:

Ինչպես արդեն հաղորդվել է, ԱՄՆ-ի նախագահ Բարաք Օբաման NBC հեռուստաընկերությանը տված հարցազրույցում հայտարարել է, որ իր երկիրն ուկրաինական ճգնաժամին ռազմական միջամտության մտադրություն չունի: «Մենք Ուկրաինայում չենք պատրաստվում ռազմական միջամտության»,-ասել է ԱՄՆ-ի ղեկավարը: Նրա խոսքով՝ «կա ավելի լավ ճանապարհ»: «Կարծում եմ՝ նույնիսկ ուկրաինացիները կընդունեին, որ անտեղի կլիներ մարտական գործողություն սկսել ռուսների դեմ: Դա օգուտ չէր բերի նաև Ուկրաինային»,- ընդգծել է ԱՄՆ-ի վարչակազմի ղեկավարը:

«Մենք մտադիր ենք մոբիլիզացնել մեր բոլոր դիվանագիտական ռեսուրսները» և «ուժեղ միջազգային» պատասխան ապահովել Ռուսաստանի գործողություններին՝ «հստակ ազդանշան» ուղարկելով Մոսկվային առ այն, որ «Ուկրաինան ինքը պետք է վճռի իր ճակատագիրը», նշել է Օբաման: Դրա հետ մեկտեղ, ինչպես նշում է ԻՏԱՌ-ՏԱՍՍ-ը, նա նախազգուշացրել է, որ ԱՄՆ-ն ու իր դաշնակիցները պատրաստ են Ռուսաստանի դեմ կիրառել ավելի խիստ տնտեսական գործողություններ, քան ավելի վաղ Արևմուտքի կողմից սահմանված պատժամիջոցները: