Իջևանում ընթանում է բանակում մահացած Արտակ Նազարյանի գործով դատավարությունը

Իջևանում՝ Տավուշի մարզի ընդհանուր իրավասության առաջին ատյանի դատարանում այս պահին ընթանում է 2010-ի հուլիսի 27-ին ծառայության վայրում մահացած Արտակ Նազարյանի գործով դատավարությունը։ 

Դատարանը գրեթե ավարտել էր գործով կարևորագույն վկա Արման Մնացականյանի նախաքննական ցուցմունքների հրապարակումը: Այսօրվա նիստին դատավորը կամ կապահովի նրա ներկայությունը դատարանում՝ հարցաքննվելու ի հայտ եկած հակասությունների վերաբերյալ, կամ էլ կհրավիրի մեկ այլ վկայի: Հիշեցնենք, որ Արման Մնացականյանը վերջին դատական նիստերին չի մասնակցում՝ առողջական խնդիրներ ունենալու հիմնավորմամբ։ Դատավարության այդ և այլ մանրամասներին Լուրեր.com-ը նախկինում արդեն անդրադարձել է։

Արտակ Նազարյանի իրավահաջորդները հայտնում են, որ դատարանը ծանուցագիր է ուղարկել, որ մարտ ամսից շաբաթական երեք նիստ է գումարելու Իջևանում, ինչը հարմար չէ դատավարության ոչ մի մասնակցի, քանի որ բոլորը Երևանում են կամ մերձակա մարզերում:

Հիշեցնենք, որ նախորդ նիստի ընթացքում դատարանը հրապարակել է Արման Մնացականյանի նախաքննական ցուցմունքը, որին տուժող կողմը չի մասնակցել: Դրանից առաջ՝ 14.02.2012 թվականին տեղի ունեցած դատավարությունը Իջևան տեղափոխելուց հետո առաջինն էր, որին տուժող կողմը մասնակցեց: Այդ նիստին տուժողը միացավ դատավորի ինքնաբացարկի միջնորդությանը և պնդեց, որ պետք է շարունակվի Արման Մնացականյանի հարցաքննությունը դատարանում, ոչ թե հրապարակվի նրա նախաքննական ցուցմունքը, ինչով դատարանը կվերածվի նոտարական գրասենյակի: Մերժում ստանալուց հետո տուժող կողմը ի նշան բողոքի լքեց դատարանի դահլիճը: