«Արտակարգ դրության իրավական ռեժիմի մասին» օրինագիծը նախագահի իշխանության պահպանման միջոց է. Լիլիթ Գալստյան

«Արտակարգ դրության իրավական ռեժիմի մասին» օրինագծի վերաբրյալ ԱԺ–ում կարծիքները կիսվել են. խորհրդարանական ընդդիմությունը և որոշ պատգամավորներ կտրականապես դեմ հանդես եկան այս օրինագծի ընդունմանը, քանի որ այն ունի շեշտված հակասահմանադրական բնույթ։ Մասնավորապես՝ ՀՅԴ խմբակցության պատգամավոր Լիլիթ Գալստյանը կարծիք հայտնեց, որ այս օրինագիծն ուղղված է նախագահի իշխանության ապահովմանը, և ազգային ժողովի դերն այստեղ անտեսված է։

«Հայրենիք և իշխանությունը բացարձակապես տարբեր արժեքներ են», – նշեց պատգամավորը՝ հավելելով, որ այս օրինագիծը ներկայացնել իբրև ժողովրդի պաշտպանությանն ուղղված քայլ, «գոնե ազնիվ չէ»։

Իսկ «Ժառանգություն» խմբակցության պատգամավոր Զարուհի Փոստանջյանը իր ելույթում նշեց, որ այս օրինագծի շրջանառության մեջ հայտնվելուց կարելի է եզրակցնել, որ նախատեսվում է  այնպիսի ընտրությունների անցկացում, որոնց արդյուքները չեն բավարարաի ներկա իշխանություններին։ Պատգամավորը կարծիք հայտնեց, որ բանակը ստեղծվել է ոչ թե այն իշխանավորին պաշտպանելու, որը անօրինական կարգով իրեն հռչակում է նախագահ, այլ երկրի տարածքային ամբողջականության և անվտանգությունը պահպանելու համար։

Նույն խմբակցության պատգամավոր Լարիսա Ալավերդյանի համար անհասկանալի է ինչպես օրինագծի ընդունման նպատակն, այնպես էլ՝ այն, թե ինչի՞ դեմ է դուրս գալու ժողովուրդը, որ հնարավոր չլինի ստեղծված իրավիճակը վերահսկել դրա համար սահմանված ուժերով։

«Մենք տեսնում ենք, որ կառավարությունը ուզում է սահմանափակել ԱԺ առանց այդ էլ կրճատված լիազորությունները», – եզրափակեց նա։