Կառավարության կողմից որևէ դավ չկա՞

«Ես չեմ ուզում, որ իմ երկրում քաղաքական ընդդիմությունը այսքան թույլ լինի։ Ես ուզում եմ, որ այն հզոր լինի, որովհետև դա պետության կայացման գրավականն է», – այսօր ԱԺ-ում իր ելույթի ընթացքում նշեց ՀՀ արդարդատության նախարար Հրայր Թովմասյանը՝ անդրադանալով «Արտակարգ դրության իրավական ռեժիմի մասին» օրինագծի քննարկմանը խորհրդարանական ընդդիմության ելույթներին։

«Մի քանի բաներ կան, որոնց ես ուղղակիորեն չեմ ուզում հավատալ. ես չեմ ուզում հավատալ, որ քաղաքական ընդդիմության փաստարկները հենց այն են, ինչ որ կան, որովհետև, կներեք, դրանք թույլ էին», – հավելեց նախարարը։ Իր ելույթի ընթացքում Թովմասյանը նաև հույս հայտնեց, որ այնտեղ հնչեցված կարծիքները նախընտրական երանգներ իրենց մեջ չեն պարունակում, «որովհետև այն խնդիրները, որոնք այսօր են դրված և այս օրենքով՝ շատ ավելի կարևոր են»։

Նախարարն ըմբռնումով է մոտենում նրան, որ շատերը այս օրինագիծը դիտարկում են «ոչ վաղ անցյալի տխուր իրադարձությունների ազդեցության տակ», և իրենցից անկախ ենթատեքստ կամ դավ են տեսնում կառավարության կողմից։

«Ես հավաստում եմ, որ չկա կառավարության կողմից որևէ դավ... Մենք պարզ ու ազնիվ ասում ենք այն, ինչ մտածում ենք», – նշեց նա՝ հավատացնելով, որ այս օրինագիծը, սահամնադրական կարգի պահպանումից զատ, այլ նպատակ չի հետապնդում։ «Ես պարզապես պիտի ասեմ, որ ժամանակն է լինելու մեր այս վեճի դատավորը», – իր ելույթը եզրափակեց նախախարը։

Հիշեցնենք, որ Աժ այս քառօրյայում քննարկվում է «Արտակարգ դրության իրավական ռեժիմի մասին» ՀՀ կառավարության ներկայացրած լրամշակված օրինագիծը, որը հաստատելու դեպքում հնարավոր է դառնում արտակարգ դրության ժամանակ բանակի օգտագործումը։