ՀՀԿ-ում բազմակարծությո՞ւն է

Քաղաքականությունը զինվորականների գործը չէ, թողենք մեր բանակին հանգիստ, և թողնենք, որ ստանձնի միմիայն հայրենիքի պաշտպանությունը, մեր բանակին չհակադրենք մեր ժողովրդին, նախօրեին իր ելույթի ընթացքում ասաց ՀՀԿ խմբակցության պատգամավոր Ռաֆիկ Պետրոսյանը, որն «Արտակարգ դրության իրավական ռեժիմի մասին» օրինագծի այս տեսքով ընդունմանը  դեմ է։

Պատասխանելով Լուրեր.com–ի թղթակցի հարցին, թե չի՞ մտահոգվում արդյոք պատգամավորը, որ իր արտահայտած դիրքորոշումը կարող է Հանրապետական կուսակցության կողմից բացասական մեկնաբանվել, Պետրոսյանը նշեց. «Առողջ դատողության դեպքում, կարծում եմ, իմ դեմ դա չպիտի մեկնաբանվի, որովհետև ես ասում եմ ճշմարտությունը։ Սա հակասահմանդրական օրենք է»։ 

«Զինված ուժերը կարող են օգտագործվել արտակարգ դրության ժամանակ, բայց ո՛չ քաղաքական նպատակներով, որովհետև եթե մենք հիմա թույլ ենք տալիս, որ զինված ուժերը օգտագործվեն քաղաքական նպատակներով, վաղը ընդդիմությունը կարող է կազմակերպել, զինված ուժերը հանել պետության դեմ և ի վնաս գնա իշխանությանը», – նշեց պատգամավորը՝ հավելեով, որ բանակը քաղաքական նպատակներով չպետք է օգտագործի ո՛չ իշխանությունը, ո՛չ ընդդիմությունը։