Ընդմիջման ժամանակ հասցրեցին երեք հոգու փոխարեն քվեարկել. Անահիտ Բախշյան

Երեկ «Արտակարգ դրության իրավական ռեժիմի մասին» օրինագծի քվեարկության ընդմիջման ժամանակ Աժ-ում հասցրել են երեք հոգու փոխարեն քվեարկել։ Այս մասին Լուրեր.com-ի թղթակցին հայտնեց «Ժառանգություն» խմբակցության անդամ Անահիտ Բախշյանը։

«Այս անգամ մեր իրավասությունն էր՝ չքվեարկել և կանգնել ՀՀԿ խմբակցության անդամների համար նախատեսված աթոռների մոտ՝ քվորումի կեղծման դեպքերը կանխելու նպատակով։ ՀՀԿ պատգամավոր Մանվել Բադեյանն իրենց հսկելը վիրավորական համարեց, իսկ մեզ համար վիրավորական է այն փաստը, որ ամբողջ Հայաստանն է տեսնում. քվեարկություն՝ մեկը մյուսի փոխարեն»,- նշեց Անահիտ Բախշյանը։

Անդրադառնալով «Ժառանգության» ներկայացուցիչների «վերահսկողական գործունեության» նկատմամբ Մանվել Բադեյանի վերաբերմունքին՝ Անահիտ Բախշյանն ասաց, որ ինքը ՀՀԿ պատգամավորի ասածները ցավոտ չի տանում և որ Բադեյանի ասածը քաղաքական գործելակերպի հետ ոչ մի եզր չունի։ 

Անդրադառնալով ԱԺ-ի մեծամասնության կողմից «Արտակարգ դրության իրավական ռեժիմի մասին» օրինագծին կողմ քվեարկելուն՝ «Ժառանգության» ներկայացուցիչը կարծիք հայտնեց, որ օրենքն «աննախադեպ վատն է»։

«Երկրի սահմանադրական կարգի խախտման դեպքերում օրենքում զինված ուժերի մասնակցությանը միայն բացասական հետևանքների կհանգեցնի, ընդ որում՝ օրենքի այս մասը հստակեցված չէ»,-ընդգծել է Անահիտ Բախշյանը՝ հավելելով, որ «Ժառանգությունը» օրենքի երկրորդ ընթերցմանը պայքարելու է՝ դրա ընդունումը կանխելու համար։

Հիշեցնենք, որ երեկ «Արտակարգ դրության իրավական ռեժիմի մասին» օրինագծի քվեարկության ժամանակ «Ժառանգություն» խմբակցության պատգամավորներ Անահիտ Բախշյանն ու Զարուհի Փոստանջյանը կանգնել էին ՀՀԿ խմբակցության համար նախատեսված աթոռների շարքերում, որպեսզի հետևեն, ըստ այդմ՝ կանխեն ուրիշի փոխարեն կոճակ սեղմողների «գործունեությունը», ինչը առաջ էր բերել ՀՀԿ պատգամավոր Մանվել Բադեյանի դժգոհությունը։

«Պատգամավորը որտեղ ուզի՝ ընդեղ կկանգնի։ Բայց էդ պատգամավորն էլ պտի մտածի մի քիչ հարգելու մասին։ Իրա վրա չվերցնի «բերդի նադզիռատելի ֆունկցիան», ինձ էլ դնի հանցագործի տեղ։ Ես ինձ վիրավորված եմ զգում, խնդրում եմ ինձ չվիրավորել»,–նշել էր պատգամավորը։