ԿԸՀ–ի որոշումը պարապության արգասիք է. Լևոն Բարսեղյան

« Ով–ով, բայց Տիգրան Մուկուչյանը շատ լավ հասկանում է, որ այս տեսակ որոշումներով ոչ մի խոչնդոտ լրագորղների առաջ չի ստեղծում», – Կենտրոնական ընտրական հանձնաժողովի օրերս ընդունած որոշման մասին կարծիք հայտնեց Գյումրիի լրագրողների «Ասպարեզ» ակումբի նախագահ Լևոն Բարսեղյանը։ Հիշեցնենք, որ այդ որոշման համաձայն՝ ԿԸՀ–ն ընտրական գործընթացները թույլ կտա լուսաբանել և կհավատարմագրի միայն այն լրագրողներին, որոնք ընտրական հանձնաժողովների (պաշտոնատար անձանց) գործունեության մասին չեն տարածել այնպիսի տեղեկություններ, որոնք չեն համապատասխանում իրականությանը (ինչը հաստատվել է դատարանի վճռով):

«Լրագրողներին այսպիսով կարող են մղել որևէ թեկնածուի վստահված անձ դառնալուն, որպեսզի այդ մարդը կարողանա գոնե այդ ճանապարհով մտնել ընտրական տեղամաս և լուսաբանել։ Սրանք այն ամենաանցակալի զարգացումներն են, որոնց մղում է ԿԸՀ այս որոշումը, որը երևի թե պարապության արգասիք է», – կարծում է Բարսեղյանը։ Ըստ նրա՝ եթե անգամ լրագորղը հրապարակել է տեղեկություններ, որոնք 12 տարի առաջ չեն համապատասխանել իրականությանը, այս որոշումը կարելի է միայն «ցինիզմ» որակել, քանի որ դրանով ԿԸՀ–ում «անուղղելի են հայտարարում այդ լրագրողին և համարում, որ լրագրողը սխալվելու իրավունք չունի»։

Մյուս կողմից էլ, Բարսեղյանի կարծիքով, ԿԸՀ–ն պետք է ուսումնասիրի հավատարմագրման հայտ ներկայացրած բոլոր լրագրողների անձնական գործերը՝ պարզելու համար նրա անցյալում վերոհիշյալ մեղադրանքով դատական վճռի առկայությունը։

«Այսինքն՝ այս հանձնաժողովին երևի երկու–երեք հատ էլ հավատաքննիչ հանձնաժողով է պետք, որպեսզի կարողանան հայտ ներկայացրած, օրինակ, 2000 լրագրողների անձնական գործերը քրքրել, պարզել, հետո որոշում կայացնել մերժել ընտրութուններ լուսաբանելու նրանց հնարավորությունը», – նշեց լրագրողը։ 

Իսկ այն հարցին, թե հնարավոր է արդյոք, որ «Ասպարեզ» ակումբի նախագահը այս որոշումը բողոքարկելու փորձ անի, Բարսեղյանը պատասխանեց. «ԿԸՀ–ն ո՞վ է, որ ես իր դեմ իր դատական համակարգում հայց ներկայացնեմ։ Հայաստանում իշխանությունը վաղուց և հիմնովին զավթված է։ Իշխանության դեմ հայցերը դատապարտված են տապալման, մանավանդ երբ այդ հայցերը ուղղակի առնչություն ունեն իշխանության վերարտադրման գործընթացների հետ, որ կոչվում են «ընտրություններ»»։ 

Վերջինս կարծում է, որ այս որոշման դեմ բոլոր դատական հայցերը դատապարտված են տապալման, եթե դրանք շոուի մաս չեն։ «Այ, օրինակ՝ որևէ իշխանական ԶԼՄ այժմ կարող է բողոք ներկայացնել ԿԸՀ կամ այսպես կոչված «Մարդու իրավունքների» այսպես կոչված «պաշտպանը», որ արդեն դիմել է ԿԸՀ, որ այս որոշումը վերանայվի։ Եթե այդ որոշումը  վերանայեն, ես սա կդիտարկեմ որպես շոու»։ Իր այս տեսակետը նա հիմնավորեց նրանով, որ ԿԸՀ նախագահը շատ լավ հասկանում է այս որոշման անիմաստությունը, մանավանդ եթե հաշվի առնենք Լևոն Բարսեղյանի սեփական տվյալները, համաձայն որոնց՝ որոշման մեջ հիշատակված զանցանքներ կատարած  լրագրողներ Հայաստանում չկան։ Նրա կարծիքով՝ այս որոշմամբ ԿԸՀ–ն պարզապես ինչ–որ հանձնարարություն է կատարում, որը բխում է մեկ այլ հանձնարարությունից, քանի որ լրագրողը, որը ուզում է այս ընտրությունները լուսաբանել, այս կամ այն կերպ կունենա այդ հնարավորությունը։