Երևի Սերժ Սարգսյանը նկատի ունի Հայկ Գևորգյանի նկատմամբ ակնհայտ ապօրինի քրգործի հարուցումը. Արթուր Սաքունց

Այսօր կայացած ՀՀԿ 13-րդ համագումարի ժամանակ Սերժ Սարգսյանն ասել է. «Մենք մերժել ենք հրապարակային հայհոյանքն իբրև քաղաքական երևույթ և դեմ գնացել ազատ խոսքի, այդ թվում նաև լրագրողների հանդեպ բռնությունների' մասնավորապես ֆիզիկական բռնությունների, գարշելի երևույթին»:

Պարզելու համար, թե որքանով են վերացել լրագրողների հանդեպ բռնությունները, Լուրեր.com-ը զրուցեց Հելսինկյան Քաղաքացիական Ասամբլեայի Վանաձորի գրասենյակի ղեկավար Արթուր Սաքունցի հետ, որն ասաց. «Երևի Սերժ Սարգսյանը նկատի ունի Հայկ Գևորգյանի նկատմամբ ակնհայտ ապօրինի քրեական գործի հարուցումը և առանց որևիցե հիմքի ձերբակալումը։ Լրատվական միջոցների նկատմամբ հետապնդումները, խոշոր հաշվով, չեն վերացել: Որպես ապացույց փաստարկում եմ զրպարտության, արժանապատվության, վիրավորանքի հիմքերով ընդդեմ լրագրողների և լրատվական միջոցների բազմաթիվ դատական գործերը՝ պաշտոնատար անձանց կողմից ներկայացված հայցերի հիման վրա՝ նկատի ունենալով այդ թվում նաև հենց Սերժ Սարգսյանի կուսակցության անդամ հանդիսացող պատգամավորների կողմից՝ սա մեկ: Երկրորդը՝ փորձը ցույց է տալիս, որ համապետական ընտրությունների ժամանակ լրագրողների նկատմամբ բազմաթիվ ոտնձգություններ են լինում, բռնություններ, նրանց գործունեության խոչըդոտում: Վերջին նմանատիպ դեպքերից էր նաև Հրազդանում ՏԻՄ ընտրությունների ժամանակ այն ընտրական տեղամասում, որտեղ ես էի, երբ վստահված անձն ընտրական տեղամասում ակնհայտորեն փորձեց խոչընդոտել լրագրողի կողմից նկարահանումները: Այդ տեսանյութը տարածվել է նաև համացանցում: Ի՞նչ է արվել իրավապահ մարմինների կողմից, ի՞նչ հանձնարարություն է տվել հենց ինքը՝ Սերժ Սարգսյանը Վովա Գասպարյանին, որ այդ միջադեպի ուղղությամբ քննություն գնա: Եվ ես որևիցէ ակնկալիք չունեմ, որ առաջիկա խորհրդարանական կամ նախագահակն ընտրությունների ժամանակ այդ ամենը չի կրկնվի։ Ավելին՝ համոզված եմ, որ կլինեն անպայման, քանի որ նախկինում նման արարքներ կատարած, բռնություններ կատարած անձինք չեն դատապարտվել, պատասխանատվության չեն ենթարկվել»: