Վիկտորիա Բեքհեմը ՄԱԿ-ի բարի կամքի դեսպան է նշանակվել ՄԻԱՎ-ի և ՁԻԱՀ-ի հարցերով

Բրիտանացի դիզայներ և Spice Girls փոփ-խմբի նախկին մասնակից Վիկտորիա Բեքհեմը նշանակվել է ՄԱԿ-ի ՄԻԱՎ/ՁԻԱՀ-ի գծով միավորված ծրագրի բարի կամքի դեսպան, տեղեկացնում է «Արմենպրես»-ը:

Բեքհեմի խոսքով՝ ՁԻԱՀ-ի դեմ պայքարով ինքը որոշել է զբաղվել այն բանից հետո, երբ այս տարվա փետրվարին այցելել է Քեյփթաուն:

«Միայն քառասուն տարեկանին մոտ ես հասկացա, որ, որպես կին ու մայր, որոշակի պատասխանատվություն ունեմ»,- հայտարարել է դիզայները ՄԱԿ-ի Գլխավոր ասամբլեայի՝ Նյու Յորքում ընթացող 69-րդ նստաշրջանում:

Ինչպես նշել է համաշխարհային կազմակերպության ներկայացուցիչը, Բեքհեմը կօգնի ՄԱԿ-ին վերջ դնել ՄԻԱՎ վարակով երեխաների ծնվելու դեպքերին և անհրաժեշտ դեղորայքով ու խնամքով ապահովել ՄԻԱՎ-վարակակիր կանանց:

ՄԱԿ-ի տվյալներով՝ առավել մեծ թվով ՄԻԱՎ վարակակիրներ՝ 24,7 մլն մարդ, ապրում են Աֆրիկայի՝ Սահարայից հարավ ընկած երկրներում: Ընդ որում նրանց 58 տոկոսը կանայք են: ՄԱԿ-ը խնդիր է դրել ՄԻԱՎ-ը լիովին հաղթահարել մինչև 2030 թվականը:

Օգոստոսին Բեքհեմը բարեգործական ինտերնետ-աճուրդի էր հանել իր շուրջ 600 հանդերձներ՝ աֆրիկյան երկրներում ՄԻԱՎ-ով վարակված մայրերի համար գումար հավաքելու նպատակով, հաղորդել է ԻՏԱՌ-ՏԱՍՍ-ը: