Թբիլիսին կբարելավի ՌԴ-ի հետ հարաբերությունները, բայց ոչ ի վնաս ինքնիշխանության. Ղարիբաշվիլի

Վրաստանը ձգտում է նորմալացնել հարաբերությունները Ռուսաստանի հետ, բայց ոչ ի վնաս «ինքնիշխանության և անկախության»: Այդ մասին, ինչպես տեղեկացնում է «Արմենպրես»-ը, հայտարարել է հանրապետության վարչապետ Իրակլի Ղարիբաշվիլին՝ Նյու Յորքում ելույթ ունենալով ՄԱԿ-ի Գլխավոր ասամբլեայի ընդհանուր քաղաքական բանավեճի ընթացքում: Նրա խոսքով՝ այդ նպատակով Թբիլիսին նոր քաղաքականություն է որդեգրել Մոսկվայի հետ հարաբ երություններում:

«Մենք՝ վրացիներս, ցանկանում ենք լավ հարաբերություններ ունենալ Ռուսաստանի հետ, բայց ոչ ի վնաս մեր ինքնիշխանության և անկախության: Ուստի Ռուսաստանի հետ հարաբերություններում մենք առաջնորդվում ենք այնպիսի ռազմավարությամբ, որը հիմնված է պատասխանատու, պրագմատիկ և կառուցողական հարևան լինելու ձգտման վրա»,- ասել է նա:

Մասնավորապես, Ղարիբաշվիլիի խոսքով՝ Թբիլիսին «առանց նախապայմանների» Մոսկվայի հետ երկխոսություն սկսեց առևտրական, տնտեսական ու մշակութային կապերը վերականգնելու շուրջ: Այդ ռազմավարական ուղղությունն «էական արդյունքներ բերեց և օգնեց թուլացնել լարվածությունը Վրաստանի և Ռուսաստանի հարաբերություններում»:

«Վերսկսվեց առևտուրը, և Վրաստանից Ռուսաստան արտահանումն ավելացավ 300 տոկոսով: Մենք սկսեցինք ավելի խաղաղ գոյակցել որպես հարևաններ: Այդ մոտեցումը նաև բերեց ամբողջ Հարավային Կովկասի կայունացման»,- հայտարարել է վարչապետը: Դրա հետ մեկտեղ նա պնդել է, որ «Ռուսաստանին ձիթենու ճյուղ պարզելու» վրացական իշխանությունների փորձերը «նույն ոգով համագործակցելու պատասխան չեն ստացել», հաղորդել է ԻՏԱՌ-ՏԱՍՍ-ը: