Շուրջ 150 մարդ է բնակվում ժայթքող Օնտակե հրաբխի լանջերին

Աշխարհ 27 Սեպտեմբեր, 2014 20:43

Շուրջ 150 մարդ է մնում Օնտակե հրաբխի լանջերին, որի ժայթքումն սկսվել է Ճապոնիայի Նագանոյի պրաֆեկտուրայում, տեղեկացնում է «Արմենպրես»-ը՝ հղում անելով ճապոնական ԶԼՄ-ներին:

Անակնկալ ժայթքումը հանկարծակիի է բերել ավելի քան 200 ալպինիստների ու զբոսաշրջիկների, որոնք դրա սկսվելու պահին գտնվում էին հրաբխի շրջանում: Նրանցից մոտավորապես 60-ն շտապ կարգով ցած են իջել: Մնացածներն օդում մոխրի կուտակման պատճառով ստիպված են եղել ապաստանել Օնտակեի լանջերի երկու ալպինիստական ճամբարներում: Նրանց օգնության են շտապում հրշեջ վարչության աշխատակիցները, որը Ճապոնիայում արտակարգ իրավիճակների նախարարության գործառույթներ է կատարում:

Ներկայում Նագանոյի հրշեջ վարչությունը հաղորդել է հրաբխի ժայթքման հետևանքով ութ տուժածների մասին: Նրանցից մեկը ծանր վիճակում տեղափոխվել է հիվանդանոց, մնացածները թեթև վնասվածքներ են ստացել:

Նաև տեղեկություններ են ստացվում չորս ալպինիստների մասին, որոնց վրա հրաբխային մոխիր է թափվել: Նրանցից մեկին հաջողվել է փրկել: Ներկայում փրկարարները ջանքեր են գործադրում ազատելու մնացածներին: Փրկարար ծառայությունների տվյալներով՝ մոխրի տակ հայտնվածներից մեկը կորցրել է գիտակցությունը: Բացի այդ, առնվազն մեկ մարդ անհայտ կորած է համարվում: Ականատեսների վկայությամբ՝ հրաբխի հարավային լանջն արդեն ծածկվել է ավելի քան 15 սանտիմետր հաստությամբ մոխրով:

Հրաբխի ժայթքումն սկսվել է սեպտեմբերի 27-ի առավոտյան: Ճապոնիայի Ազգային օդերևութաբանական վարչությունը հրաբխի մերձակայքում վտանգավորության մակարդակը մինչև 3 բալ է բարձրացրել՝ ըստ 5-բալանոց սանդղակի, և արգելել է 4 կիլոմետրից պակաս հեռավորությամբ մոտենալ դրան:

Դատելով այն կադրերից, որոնք ցուցադրում է NHK ճապոնական հեռուստաալիքը, խառնարանի վրա բարձրանում է մոխրի մի քանի կիլոմետրանոց սյունը: Օնտակեի հարակից շրջանների բնակիչները հայտնել են հրաբխի խառնարանում մի քանի պայթյունների և ապարների արտանետումների մասին:

Օնտակե հրաբուխը գտնվում է Տոկիոյից մոտավորապես 200 կմ արևմուտք ընկած շրջանում: Վերջին անգամ այն ժայթքել է 2007 թվականին

Հրաբխի ժայթքման կապակցությամբ Ճապոնիայի վարչապետ Սինձո Աբեի Տոկիոյի նստավայրին առընթեր ստեղծվել է ճգնաժամային շտաբ, հաղորդել է ԻՏԱՌ-ՏԱՍՍ-ը: