Մուսուլմանները «Թվիթեր»-ում ֆլեշմոբ են անցկացնում իսլամաատյացության դեմ

Ողջ աշխարհի մուսուլմանները, Մերձավոր Արևելքում իրավիճակի լարվածությամբ պայմանավորված և ԶԼՄ-ներում ակտիվացած իսլամատյացության ալիքին հակազդեձլու համար ֆլեշմոբ ակցիաներ են սկսել «Թվիթեր»-ում: Նրանք #MuslimApologies (մուսուլմանը ներողություն է հայցում) հեշթեգով, սարկազմի ոճով «ներողություն են խնդրում» իրենց կրոնական պատկանելիության համար: Այս մասին հաղորդում է «Արմենպրես»-ը` վկայակոչելով «ՌԻԱ Նովոստի»-ին:

«Թվիթեր»-ի օգտատերերը, ովքեր մուսուլմանության հետևորդներ են, նշում են, որ հոգնել են իրենց հասցեին ուղղված անընդհատ մեղադրանքներից և դեմ են դուրս եկել «իսլամ=ահաբեկչություն» բանաձևին, որը ԶԼՄ-ներում պտտվում է արդեն 10 տարուց ավելի:

Այս հեշթեգով հրապարակումները մեծ տարածում ունեն ցանցում: Վերջին 48 ժամվա ընթացքում այն օգտագործվել է 30 հազար անգամ: Օգտատերերը «ներողություն են խնդրում» այն ձեռքբերումների համար, որոնք արաբական աշխարհի ներկայցուցիչներն են ներդրել գիտության ոլորտում մարդկության ողջ պատմության ընթացքում:

Նմանատիպ հաղորդագրություններ են տեղ գտնում այդ հեշթեգի ներքո`«Ես ցավում եմ, որ աշխարհում առաջին համալսարանը բացվել է մուսուլման կնոջ` Ֆաթիմա Մուհամմեդ Ալ Ֆիհրիի կողմից, 859 թվականին, Մարոկկոյի Ֆես քաղաքում», կամ` «Կներեք, որ Իսահակ Նյուտոնը իմացել է գրավիտացիայի մասին արաբ գիտնական Իբն ալ Հայսամի գրքից»:

Սեպտեմբերի կեսերին ինտերնետ-արշավ սկսվեց #NotInMyName հեշթեգով, որը օգտագործվեց մոտ 50 հազար անգամ: Առաջին հաղորդագրությունը հետևյալն էր` «Ալ Քաիդա, Թալիբան, ԻՍԻՍ և 9/11 … այս ամենն ինձ ու իմ հետաքրքրությունները չեն ներկայացնում, իմ կրոնը չի ենթադրում ատելություն ու սպանություն»: