Քեմերոնը հրապարակավ ներողություն է խնդրել Եղիսաբեթ Երկրորդ թագուհու հասցեին արած արտահայտության համար

Մեծ Բրիտանիայի վարչապետ Դևիդ Քեմերոնը հրապարակավ ներողություն է խնդրել Եղիսաբեթ Երկրորդ թագուհու հետ իր խոսակցության կապակցությամբ արված չմտածված արտահայտության համար, տեղեկացնում է «Արմենպրես»-ը:

Ելույթ ունենալով BBC հեռուստաընկերության եթերում՝ կառավարության ղեկավարն այդ կերպ է մեկնաբանել իր խոսքերն այն մասին, որ թագուհին ուրախությունից «մռլտացել» է, երբ ինքը նրան հայտնել է հանրաքվեում Շոտլանդիայի անկախության հակառակորդների հաղթանակի մասին:

Քեմերոնի այդ արտահայտությունը, որը նա արել է սեպտեմբերի 23-ին ԱՄՆ իր այցի ժամանակ, նախատեսված չէր հանրության համար, բայց այն պատահաբար ձայնագրել են լրագրողները:

BBC-ին տված հարցազրույցում Քեմերոնը սեպտեմբերի 28-ին ասել է. «Դա այն պահերից մեկն է, երբ դու հետ ես նայում և սկսում ես քեզ խիստ նախատել: Ես չպետք է նման խոսակցություն սկսեի, ներողություն եմ խնդրում դրա համար և ես շատ անհարմար վիճակում եմ»:

«Ես ներողություն խնդրեցի և կարծում եմ, որ ինձ վերստին հարկ կլինի դա անել»,- հավելել է Քեմերոնը: «Ես եմ ափսոսում, ես երբեք այլևս չեմ քննարկի իմ շփումներն արքունիքի հետ»,- ասել է նա:

Դաունինգ սթրիթում վարչապետի դիվանատունը նրա ներողությունը փոխանցել է թագավորական Բուքինհեմյան պալատի ներկայացուցիչներին, ավելի վաղ հայտնել է կառավարության մամուլի ծառայությունը: Բրիտանական ԶԼՄ-ների տվյալներով՝ Դևիդ Քեմերոնը մտադիր է Եղիսաբեթ Երկրորդից անձամբ ներողություն խնդրել իրենց հաջորդ հանդիպման ժամանակ, հաղորդել է ԻՏԱՌ-ՏԱՍՍ-ը: