Իրանի միջուկային խնդրի շուրջ բանակցությունները կվերսկսվեն երկու շաբաթից

Իրանի արտաքին գործերի փոխնախարար Աբաս Արաքչին հայտարարել է, որ իրանական միջուկային հարցի շուրջ Թեհրանի և միջազգային միջնորդների «վեցյակի» ներկայացուցիչների միջև բանակցությունները Եվրոպայում կվերսկսվեն երկու շաբաթից, տեղեկացնում է «Արմենպրես»-ը՝ հղում անելով ճապոնական Kyodo գործակալությանը:

Ինչպես Արաքչին հայտարարել է գործակալությանը տված հարցազրույցում, որը հրապարակվել է սեպտեմբերի 29-ին, բանակցորդների միջև դեռևս «տարաձայնություններ են մնում մի շարք կարևոր հարցերի շուրջ»: «Մենք հնարավորություն ունեինք առավել մեծ փոխըմբռնման հասնելու կառուցողական մթնոլորտում, բայց տարաձայնություններ կան կարևոր հարցերում»,- նշել է Իրանի փոխարտգործնախարարը:

2013 թվականի նոյեմբերին Ժնևում Իրանը և միջազգային միջնորդների «վեցյակը» (Ռուսաստան, ԱՄՆ, Մեծ Բրիտանիա, Ֆրանսիա, Չինաստան և Գերմանիա) պայմանավորվել էին մինչև հուլիսի 20-ը համաձայնեցնել փաստաթուղթ, որը կերաշխավորի Իրանի միջուկային ծրագրի բացառապես խաղաղ բնույթը, ինչի փոխարեն չեղյալ կհայտարարվեն հանրապետության դեմ սահմանված պատժամիջոցները: Այնուհետև ժամկետը երկարացվել է մինչև նոյեմբեր:

Սեպտեմբերի 18-26-ին Նյու Յորքում Իրանի և «վեցյակի» բանակցությունների հերթական փուլից հետո չի հաջողվել բեկման հասնել ապագա համաձայնագրի հանգուցային հարցերում: Մոսկվան այն կարծիքին է, որ բանակցություններում հաջողվել է առաջընթացի հասնել իրանական խնդրի հանգուցալուծումներ զանազան տարբերակներ մշակելու գործում, սեպտեմբերի 27-ին հայտնել է ՌԴ-ի ԱԳ նախարարությունը:

Ավելի վաղ Իրանի նախագահը հույս է հայտնել, որ համաձայնությունը կարող է ձեռք բերվել սահմանված ժամկետում՝ մինչև նոյեմբերի 24-ը, և հայտարարել է, որ Իրանը կշարունակի զարգացնել խաղաղ միջուկային ծրագիրը, ներառյալ ուրանի հարստացումը՝ միջազգային իրավունքին համապատասխան, հաղորդել է ՌԻԱ Նովոստին: