Ավստրալիան միանում է ԻՊ-ի դեմ ՆԱՏՕ-ի առաքելությանը

Ավստրալիայի ռազմաօդային ուժերը հոկտեմբերի 1-ից մասնակցում են Իրաքում «Իսլամական պետության» դեմ ՆԱՏՕ-ի առաքելությանը: Այդ մասին, ինչպես տեղեկացնում է «Արմենպրես»-ը՝ հղում անելով BBC-ին, հայտարարել է երկրի վարչապետ Թոնի Էբոտը:

Նա նշել է, որ մարտական գործողություններին մասնակցելու համար ավստրալական ինքնաթիռներ ուղարկելու վերջնական որոշում դեռևս չի ընդունվել, բայց հոկտեմբերի 1-ից դրանք թռչելու են Իրաքի օդային տարածությունում՝ դաշնակիցների գործողություններին աջակցելու համար:

Անցած ամսին Ավստրալիան առաքելությանը մասնակցելու համար ուղարկել է F/A-18 Super Hornet ութ կործանիչ-ռմբակոծիչ և շուրջ 600 զինվորական ու քաղաքացիական մասնագետներ:

Հաղորդվում է նաև, որ Ավստրալիայի ոստիկանությունը հակաահաբեկչական գործողություն է անցկացնում Մելբուռնի արվարձաններում, իսկ իշխանությունները խստացնում են անվտանգության համակարգը՝ կապված «Իսլամական պետության» կողմից ահաբեկչական սպառնալիքների հետ:

Ավելի վաղ ավստրալական ԶԼՄ-ները հաղորդել են, որ ԻՊ-ի ոմն առաջնորդ հրամայել է Ավստրալիայում իր հետևորդներին՝ իրականացնել մի շարք «ցուցադրական սպանություններ»: