ԻՊ-ի դեմ գործողությունն արդեն 1 մլրդ դոլար է նստել Պենտագոնի վրա

ԱՄՆ-ի պաշտպանության նախարարությունն արդեն շուրջ 1 մլրդ դոլար է ծախսել «Իսլամական պետություն» ահաբեկչական խմբավորման դեմ գործողության վրա: Այդ մասին, ինչպես տեղեկացնում է «Արմենպրես»-ը, հոկտեմբերի 2-ին հաղորդել է NBC News հեռուստաալիքը:

Պենտագոնի մասնագետների հաշվումների համաձայն՝ հունիսի 16-ից, երբ ԱՄՆ-ի օդուժն սկսեց հետախուզական թռիչքներ իրականացնել տարածաշրջանում, գործողության արժեքն օրական կազմում էր 7,5 մլն դոլար: Ծախսերն օրական մինչև 10 մլն դոլար ավելացան օգոստոսի 8-ից, երբ ինքնաթիռներն սկսեցին ավիահարվածներ հասցնել զինյալների դիրքերին:

Գործողության գինը կտրուկ աճեց նաև թանկարժեք բարձրտեխնոլոգիական զինամթերքի պատճառով, որն օգտագործում են ամերիկացի օդաչուները: Այսպես, զինյալների դեմ գործողության առաջին գիշերն արձակվել է «Թոմահավկ» 47 հրթիռ, որոնցից յուրաքանչյուրն արժե ավելի քան 1 մլն դոլար: Ընդամենը գործողության սկսվելուց ի վեր ԱՄՆ-ն ավելի քան 200 ավիահարված է հասցրել:

Ավելի վաղ Պենտագոնի ներկայացուցիչը լրագրողներին հայտնել է, որ ԱՄՆ-ի օդուժը, սկսած 2014 թվականի օգոստոսի 8-ից մինչև սեպտեմբերի 27-ը, 4,1 հազար մարտական թռիչք է իրականացրել Իրաքի և Սիրիայի օդային տարածությունում:

Վաշինգտոնի ռազմավարական և բյուջետային գնահատումների ոչ կառավարական կենտրոնի պատրաստած նոր զեկույցի համաձայն՝ «Իսլամական պետություն» խմբավորման դեմ ԱՄՆ-ի ռազմական գործողության իրականացման համար տարեկան կպահանջվի 2,4 միլիարդից մինչև 13-22 մլրդ դոլար: Դրա հետ մեկտեղ, «ավելի մեծ ինտենսիվության օդային գործողությունները կարող են նստել տարեկան 4,2-6,8 միլիարդ դոլար», կարծում են կենտրոնի աշխատակիցները: Իսկ ներկայիս արշավում «ցամաքային զորքերի ավելի խոշոր զորակազմի» գործադրումը կարող է հանգեցնել այն բանին, որ այդ ն պատակի համար բյուջետային հատկացումները կաճեն «տարեկան» մինչև «13-22 միլիարդ դոլար», նշում են փորձագետները:

Զեկույցը կազմողները պարզաբանում են, որ վերջին դեպքում նկատի ունեն շուրջ 25 հազար, իսկ երկրորդ դեպքում՝ մոտավորապես 5 հազար ամերիկացի զինվորների օգտագործման սցենարը, հաղորդել է ՌԻԱ Նովոստին: