Ամեն ժամ Էբոլա վիրուսով հինգ մարդ է վարակվում Սիեռա Լեոնեում

Ամեն ժամ Էբոլա մահացու վիրուսով հինգ մարդ է վարակվում Սիեռա Լեոնեում: Այդ մասին, ինչպես տեղեկացնում է «Արմենպրես»-ը, հոկտեմբերի 2-ին գրել է Independent թերթը՝ հղում անելով «Փրկեք երեխաներին» ավստրիական բարեգործական հիմնադրամին:

Ինչպես նշվում է, անցած շաբաթ միայն Սիեռա Լեոնեում գրանցվել է էբոլա տենդով վարակվելու 765 դեպք այն դեպքում, երբ հանրապետության իշխանություններն ընդամենը 327 հիվանդանոցային մահճակալ են տրամադրել վարակված քաղաքացիների համար:

Բարեգործական հիմնադրամի ներկայացուցիչները հայտարարել են մեծ թվով երեխաների մասին, որոնք մահանում են տանը կամ փողոցներում, դրանով իսկ նշելով, որ տենդի տարածման մասշտաբը խիստ թերագնահատված է:

«Դժվար է թեկուզև մոտավորապես գնահատել Էբոլա տենդից մահացած երեխաների թվաքանակը, քանի որ մենք չենք հասցնում հետևել հիվանդության տարածմանը»,- ասել է Սիեռա Լեոնեում հիմնադրամի ներկայացուցիչ Ռոբ ՄաքԳիլիվրեյը:

Ավելի վաղ Առողջապահության համաշխարհային կազմակերպությունը հայտնել է, որ Էբոլա վիրուսի զոհերի թիվը հասել է 3338-ի: Կազմակերպության տվյալներով՝ ընդամենն Արևմտյան Աֆրիկայում գրանցվել է վիրուսով վարակվելու 7 հազար 158 դեպք:

Մինչ այդ տեղեկացվել էր 3 հազար զոհվածների և 6 հազար վարակվածների մասին, հաղորդել է ՌԻԱ Նովոստին: