Գերմանիայում նշում են ԳԴՀ-ի և ԳՖՀ-ի միավորման օրը

Հոկտեմբերի 3-ին Գերմանիայում նշվում է ԳԴՀ-ի և ԳՖՀ-ի միավորման օրը՝ Գերմանական միասնության օրը, ինչի առթիվ գերմանացիներին սպասում են երկար հանգստյան օրեր և ժողովրդական տոնախմբություններ, տեղեկացնում է «Արմենպրես»-ը:

Ազգային տոնի առթիվ հիմնական միջոցառումներն այս անգամ կանցկացվեն Հաննովերում, անցյալ տարի բարձրաստիճան հյուրերին ընդունել էր Շտուտգարտը: Երևանի ժամանակով ժամը 11:30-ին Գերմանիայի նախագահ Յոահիմ Գաուկը, կանցլեր Անգելա Մերկելը, Սահմանադրական դատարանի նախագահ Անդրեաս Ֆոսկուլեն, ինչպես նաև Բունդեսթագի և Բունդեսրատի ղեկավարները, հիշատակի գրություններ կանեն Հաննովերի «Ոսկե գրքում»: Այնուհետև քաղաքի կենտրոնական մասի Սուրբ Գեորգիի և Սուրբ Հակոբի եկեղեցիներում տեղի կունենա էկումենիկ ծառայություն, որից հետո ճառով հանդես կգա Մերկելը:

Բացի այդ, ավանդաբար տոնակատարություն կլինի Բեռլինում՝ Բրանդենբուրգյան դարպասների մոտ: Այնտեղ ավտոմոբիլային երթևեկությունը դադարեցվել է արդեն նախօրյակին և կբացվի միայն կիրակի երեկոյան:

ԳԴՀ-ի և ԳՖՀ-ի միավորման մասին պայմանագիրը 1990 թվականի օգոստոսի 31-ին ստորագրել են Երկրորդ աշխարհամարտում դաշնակից չորս երկրների՝ Ռուսաստանի, ԱՄՆ-ի, Ֆրանսիայի և Մեծ Բրիտանիայի ներկայացուցիչները, հաղորդել է ՌԻԱ Նովոստին: