«Նրանք ճիշտ են». ԻԼԻՊ –ի նախկին պատանդը ապշեցրել է իր հայտարարությամբ (տեսանյութ)

CNN-ի թղթակից Արվա Դեյմոնին ապշեցրել է քուրդ տղայի ցնցող հայտարարությունը, ով առևանգվել էր ԻԼԻՊ-ի զինյալների կողմից չորս ամիս առաջ՝ դպրոցից տուն վերադառնալու ճանապարհին, երբ վերջինս ասել է, որ համաձայն է ԻԼԻՊ-ի հետ:

Մերվան Մոհամեդ Հուսեյնը պատմել է Դեյմոնին, որ սարսափահար է եղել, երբ ԻԼԻՊ-ի զինյալներն առաջին անգամ բռնել են նրան և իր համադասարանցիներին: Զինյալները տարել են երեխաներին մզկիթ աղոթելու համար, այնուհետև պահել են նրանց բանտանման «տարրական դպրոցում», որտեղ նրանց ծեծել, կտտանքների են ենթարկել և նույնիսկ կախել են պատանդներից մի քանիսին:

Սկզբում Հուսեյնը վախեցել է, որ իրեն կսպանեն, սակայն հետո եկել է այն եզրակացության, որ ԻԼԻՊ-ի զինյալները ճիշտ են. զոհին սպանելուց առաջ որոշում են «անհավատ» է նա, թե՞ ոչ:

Երեխաներին ստիպել են դիտել գլխատման տեսագրություններ: Հուսեյնի խոսքերով՝ տեսանյութերն ամենևին էլ վախ սերմանելու համար չէին ցուցադրվում: Նպատակը եղել է ԻԼԻՊ-ի մասին ճշմարտություն պատմելը: Նրանք պատահական մարդկանց չէին առևանգում փողոցում և առանց պատճառի գլխատում: Բռնում էին միայն «անհավատներին»:

Պատասխանելով այն հարցին, թե ինչ կարծիք ունի ԻԼԻՊ-ի մասին, Հուսեյնը զարմացրել է իր մորն ու քրոջը՝ ասելով, որ «նրանք ճիշտ են»: Հուսեյնն ասել է, որ քուրդ զինյալները «անհավատներ են»: Սակայն հարցազրույցի վերջում նա խոստովանել է, որ ԻԼԻՊ-ի զինյալներից միայն որոշ մասն է լավը: