Բաքվում ընդդիմության բազմահազարանոց միտինգ է տեղի ունեցել

Ադրբեջանի ընդդիմության և ժողովրդավար ուժերի «Ազգային խորհուրդ» միավորումը հոկտեմբերի 12-ին Բաքվի «Մահսուլ» մարզադաշտում «ազատություն քաղբանտարկյալներին» կարգախոսով բազմահազարանոց միտինգ է անցկացրել:

Ինչպես հաղորդում է «Արմենպրես»-ը' վկայակոչելով «Ազադլըգ» թերթը, իշխանությունները փորձել են խոչընդոտել թույլատրված միտինգի անցկացումը: Իրավապահները միտինգի մասնակիցներին թույլատրել են մտնել մարզադաշտ ակցիայից 15 րոպե առաջ' պատճառաբանելով, թե իբր ոստիկանությունը ռումբ է «որոնում» այնտեղ: Ակցիան սկսվելուց անմիջապես հետո մի քանի սադրիչ պարզել են «Իրաքի և Լևանտի իսլամական պետություն» ահաբեկչական խմբավորման դրոշը: Ակցիայի կազմակերպիչներն անմիջապես հեռացրել են նրանց մարզադաշտից և հանձնել իրավապահներին: Որոշ ժամանակ անց այդ մարդիկ կրկին հայտնվել են մարզադաշտում, ինչը խոսում է այն մասին, որ սադրանքը կազմակերպել են իշխանությունները:

Միտինգում ելույթ է ունեցել «Ազգային խորհրդի» առաջնորդ Ջամիլ Հասանլին, ով ասել է, որ եթե մեկ տարի առաջ Ադրբեջանում 10-15 քաղբանտարկյալ կար, ապա այժմ նրանց թիվը հասել է 110-115-ի:

«Միայն բռնապետական ռեժիմներն են սեփական ժողովրդի հետ այսպես վարվում: 1937 թվականի ռեպրեսիաներից հետո նույնիսկ մեր չհավանած խորհրդային ռեժիմը չէր գնում նման ձերբակալությունների: Իսկ Ադրբեջանում ընտանիքներ են ձերբակալվում»,- ասել է նա' նկատի ունենալով կալանված իրավապաշտպաններ Լեյլա և Արիֆ Յունուսներ ամուսիններին:

Ջամիլ Հասանլին ասել է, որ բոլոր կալանավորվածները բանտ են նետվել մարդու իրավունքները պաշտպանելու համար: «Մեր նպատակն ու ցանկությունը քաղաքական բանտարկյալների անմիջապես և առանց պայմանների ազատ արձակումն է»,- ասել է ընդդիմության առաջնորդը:

Միտինգում ակցիայի մասնակիցների անունից հայտարարություն է տարածվել, որում իշխանություններից պահանջվել է ազատ արձակել քաղբանտարկյալներին, վերջ դնել ռեպրեսիաներին և ազատ մամուլի ու դեմոկրատական կառույցների նկատմամբ ճնշումներին, ընտրական բարեփոխումներ անցկացնել և խորացնել Եվրամիության հետ Ադրբեջանի ինտեգրումը: