Կիմ Չեն Ընը 40 օրվա ընթացքում առաջին անգամ երևացել է հանրությանը

ԿԺԴՀ-ի առաջնորդ Կիմ Չեն Ընը 40 օրվա ընթացքում առաջին անգամ երևացել է հանրությանը՝ իր հիվանդության վերաբերյալ բազմաթիվ հաղորդումներից հետո: Այդ մասին, ինչպես տեղեկացնում է «Արմենպրես»-ը, հաղորդել է Assiciated Press գործակալությունը՝ վկայակոչելով ԿԺԴՀ-ի պետական հեռուստատեսությունը:

Կիմ Չեն Ընը հոկտեմբերի 14-ին այցելել է ԿԺԴՀ-ի Գիտությունների ակադեմիայի՝ վերջերս կառուցված՝ Բնական էներգիայի ինստիտուտ, ինչպես նաև Wisong բնակելի շրջան, որը հատուկ ստեղծվել է գիտնականների համար:

«Մեր գիտնականները հայրենասերներ են, որոնք իրենց կյանքը նվիրում են հարուստ և հզոր ազգի ստեղծմանը»,- մեջբերել է գործակալությունը Կիմ Չեն Ընի խոսքը:

Հյուսիսային Կորեայի առաջնորդը հանրության առջև չի երևացել սեպտեմբերի 3-ից, երբ կնոջ հետ ներկա է եղել համերգի, իսկ արևմտյան զանգվածային լրատվամիջոցներում տեղեկատվություն է հայտնվել այն մասին, թե երիտասարդ առաջնորդն ունի ոտքի հետ կապված խնդիրներ, որոնք առաջացել են ճարպակալումից: Ավելի վաղ ԶԼՄ-ները նշել էին, թե Կիմ Չեն Ընը դժվարանում է քայլել, և նրան 100 օր կպահանջվի վերականգնման համար, հաղորդել է ՌԻԱ Նովոստին: