Դամասկոսի կենտրոնում հրասանդ է ընկել

Դամասկոսի Բաղդադ փողոցում հոկտեմբերի 14-ին հրասանդ է ընկել: Ինչպես հաղորդում է «Արմենպրես»-ը՝ վկայակոչելով սիրիական ՍԱՆԱ գործակալությունը, տեղի ոստիկանությունը տեղեկացրել է, որ հրասանդն ընկել է Աբդ առ Ռահման աս Սադիկ մզկիթի մոտ՝ նյութական վնաս պատճառելով մզկիթին և մերձակայքում գտնվող մեքե նաներին: Բարեբախտաբար, քաղաքացիներ չեն տուժել:

Հոկտեմբերի 13-ին ահաբեկիչները պայթուցիկ սարքավորում էին տեղադրել Ռուքն ադ Դին թաղամասում կայանված մեքենայի մեջ: Պայթյունի հետևանքով վարորդը մահացել էր, իսկ մեքենան նյութական մեծ վնասներ էր կրել:

Համայում 64 զինյալ վայր են դրել զենքերը և հանձնվել իշխանություններին: Համայի նահանգապետ Ղասան Խալֆը նշել է, որ հայրենիքը շարունակում է հնարավորություն տալ իր զավակներին հետ կանգնել սխալ ճանապարհից և չձեռնարկել քայլեր հայրենիքի դեմ:

Ավելի վաղ Հոմսում և մերձակա գյուղերում 104 զինյալ վայր են դրել զենքերը և հանձնվել իշխանություններին: Իշխանություններին հանձնված զինյալները Հոմսի մի քանի թաղամասերից են, ինչպես նաև Կասիր, Հուլա, Թալբիսա, Ռուսաթան, Դեր Բաալբա և այլ բնակավայրերից: