Օբաման ԻՊ-ի դեմ պայքարը կքննարկի 20 երկրի զորահրամանատարների հետ

ԱՄՆ-ի նախագահ Բարաք Օբաման «Իսլամական պետություն» (ԻՊ) ահաբեկչական խմբավորմանը դիմակայելու ռազմավարությունը հոկտեմբերի 14-ին քննարկելու է 20 երկրների զինվորական ներկայացուցիչների հետ, ներառյալ Թուրքիան և Սաուդյան Արաբիան, տեղեկացնում է «Արմենպրես»-ը՝ հղում անելով Reuters գործակալությանը:

Հրատարակության տվյալներով՝ իր ելույթում ԱՄՆ-ի նախագահը չի կարող հաշվի չառնել Միացյալ Նահանգների կողմից ղեկավարվող կոալիցիայի վրա աճող ճնշումը՝ զինյալների հարձակումը կանգնեցնելու համար ավելի մեծ ռազմական ջանքեր գործադրելու պահանջով:

Իր խոսքում ԱՄՆ-ի նախագահը պետք է հասարակայնությանը և արտասահմանյան դաշնակիցներին ցույց տա, որ ինքն ունի արմատական խմբավորմանը ոչնչացնելու գործողությունների իրական ծրագիր, խմբավորում, որը գրավել է Իրաքի և Միրիայի մեծ տարածքներ:

Նախօրյակին Օբաման Իրաքում «Իսլամական պետություն» ահաբեկչական խմբավորման դեմ պայքարի հարցերը հեռախոսազրույցի ընթացքում քննարկել է Ֆրանսիայի նախագահ Ֆրանսուա Օլանդի հետ:

«Ղեկավարները քննարկել են ջանքերը տարածաշրջանում «Իսլամական պետության» ուժերի դեմ մղվող պայքարում և այն բանի անհրաժեշտությունը, որ կոալիցիայի գծով գործընկերները գործողություններ ձեռնարկեն ԻՊ-ի սպառնալիքը դիմագրավելու համար»,- ասված է Սպիտակ տան հաղորդագրության մեջ:

Ներկայում ԻՊ-ի դեմ Միացյալ Նահանգների և կոալիցիայի պայքարի ռազմավարությունը միանշանակ հավանության չի արժանանում ԱՄՆ-ում: Հանրապետական սենատոր Ջոն Մաքքեյնը հոկտեմբերի 12-ին հայտարարել է, որ «հաղթում են նրանք (ԻՊ-ն), այլ ոչ թե մենք»: Վիճակը բարդանում է փախստականների ավելի ու ավելի վատացող դրության պատճառով, հաղորդել է ՌԻԱ Նովոստի գործակալությունը: