Էբոլա վիրուսով վարակված ՄԱԿ-ի աշխատակիցը մահացել է Գերմանիայում

ՄԱԿ-ի բարձրաստիճան աշխատակիցը, որը Լիբերիայում վարակվել էր մահացու Էբոլա տենդով, վախճանվել է Գերմանիայում: Այդ մասին, ինչպես տեղեկացնում է «Արմենպրես»-ը, հոկտեմբերի 14-ին հայտնել են երկրի առողջապահության աշխատակիցները:

Ավելի վաղ հաղորդվել էր, որ հոկտեմբերի 9-ին հիվանդը Լիբերիայից տեղափոխվել էր Լայպցիգ, որտեղ նրան հոսպիտալացրել են տեղի կլինիկայում և կարանտինի ենթարկել: Անցած ժամանակաշրջանում բժիշկները հիվանդի վիճակը գնահատում էին՝ ծանր:

Առողջապահության համաշխարհային կազմակերպության տվյալներով՝ Արևմտյան Աֆրիկայի երկրներում Էբոլա վիրուսի զոհերի թիվը գերազանցել է 4 հազարը: Մահվան դեպքերի մեծ մասը բաժին է ընկնում երեք երկրի՝ Գվինեային, Լիբերիային և Սիեռա Լեոնեին:

Նախօրյակին ԱՄՆ-ի նախագահը և ՄԱԿ-ի գլխավոր քարտուղարը քննարկել են Էբոլա տենդի դեմ պայքարի հարցերը: Մասնավորապես, արծարծվել է «միջազգային հակազդումը Արևմտյան Աֆրիկայում Էբոլայի համաճարակին և միջազգային հանրակցության կողմից ավելի լուրջ պարտավորությունների ստանձնման և շտապ օգնություն հասցնելու անհրաժեշտությունը»:

Օբաման ընդգծել է, որ ՄԱԿ-ի անդամ երկրները պետք է տրամադրեն անձնակազմ, սարքավորումներ ու նյութեր, որոնք անհրաժեշտ են «համաճարակը կանգնեցնելու, այն երկրների ու քաղաքացիների վրա այդ ճգնաժամի ավերիչ ազդեցությանը վերջ դնելու համար, որոնց նա հարվածել է»: Օբաման և Պան Գի Մունը համաձայնել են, որ անհրաժեշտ է «կրկնապատկել ջանքերը տուժածներին օգնելու համար», հաղորդել է ՌԻԱ Նովոստին: