Ռուսաստան-ԵՄ հարաբերություններում վրա է հասել «ճշմարտության պահը». Լավրով

Ռուսաստանի արտաքին գործերի նախարար Սերգեյ Լավրովը հայտարարել է, որ Մոսկվան նախկինի պես Եվրամիությանը համարում է գործընկեր և պատրաստ է քննարկել ԵՄ-ի հետ ազատ առևտրի գոտու ստեղծման հարցը, տեղեկացնում է «Արմենպրես»-ը՝ հղում անելով ռուսական լրատվամիջոցներին: Նրա խոսքով՝ այժմ պետությունների միջև հարաբերություններում եկել է շրջադարձային պահը:

«Մեր անցյալ շփումների ընթացքում մենք ասել ենք, որ Ռուսաստանի և Եվրամիության միջև հարաբերությունները մոտեցել են յուրատեսակ ճշմարտության պահի, երբ անհրաժեշտ է որոշում ընդունել հեռանկարում փոխգործակցության զարգացման վեկտորի վերաբերյալ և պատասխանել հետևյալ հարցին. մենք միմյանց համար ռազմավարական գործընկերներ ենք արդյոք, թե, այնուամենայնիվ, մնում ենք աշխարհաքաղաքական ախոյաններ»,- ասել է նախարարը Եվրոպայի բիզնեսի ասոցիացիայի մաս կազմող ընկերությունների ղեկավարների հետ կայացած հանդիպման ժամանակ:

Ըստ որում, Ռուսաստանը պատրաստ է «փոխգործակցել այլ երկրների, այլ տարածաշրջանային միավորումների հետ», այդ թվում՝ Եվրամիության հետ ազատ առևտրի գոտու ստեղծման հեռանկարի քննարկմանը, ասել է Լավրովը:

Նա ընդգծել է, որ Մոսկվան Եվրամիության կողմից սահմանված պատժամիջոցները դիտում է որպես անիրավական և կարծում է, որ ԵՄ-ն պետք է դրանք չեղյալ հայտարարի ինքը: «Իսկ ինչ-որ մեկի կողմից ստիպողաբար առաջ քաշված պահանջները կատարել մենք չենք պատրաստվում»,- հավելել է նախարարը: