Միլանի բանակցությունները կդառնան ուկրաինական ճգնաժամի լուծման բանալին. Քերի

Միլանում կայանալիք բանակցությունները կդառնան ուկրաինական հիմնախնդրի լուծմանն ուղղված հետագա գործողությունների բանալին: Ինչպես տեղեկացնում է «Արմենպրես»-ը, այս կարծիքը ԱՄՆ-ի պետքարտուղար Ջոն Քերին հայտնել է Ռուսաստանի արտաքին գործերի նախարար Սերգեյ Լավրովի հետ Փարիզում հանդիպումից հետո կայացած մամուլի ասուլիսում:

«Մենք այն կարծիքին ենք, որ Մինսկի համաձայնություններն ընդունելի են, բայց բոլոր կետերը պետք է ամբողջովին կատարվեն,- ասել է պետքարտուղարը:- Եվ ես ակնկալում եմ, որ Միլանի հանդիպումը թույլ կտա կոնկրետացնել գործողությունների հետագա կարգը, ինչպես նաև ցույց կտա, թե որ սպասումներն արդարացան և որոնք՝ ոչ»:

Հոկտեմբերի 16-17-ին «Ասիա-Եվրոպա» ֆորումի՝ Միլանում կայանալիք գագաթնաժողովում հնարավոր են ՌԴ նախագահ Վլադիմիր Պուտինի հանդիպումները Ուկրաինայի նախագահ Պյոտր Պորոշենկոյի, Գերմանիայի կանցլեր Անգելա Մերկելի և Ֆրանսիայի նախագահ Ֆրանսուա Օլանդի հետ:

Ըստ ՌԻԱ Նովոստիի հաղորդման՝ Քերին ասել է, թե աշխարհն ավելի անվտանգ կդառնա, եթե Մոսկվան և Վաշինգտոնը միասին աշխատեն:

«Այսօր մեր նպատակն է՝ ընդլայնել Ռուսաստանի հետ միասին աշխատելու հնարավորություններն այնտեղ, որտեղ կարող ենք, ի շահ մեր երկրների և այն երկրների, որոնց վերաբերում են այն գործողությունները, որոնք մենք որոշել ենք ձեռնարկել»,- նշել է Քերին:

Իր հերթին ՌԴ ԱԳ նախարար Սերգեյ Լավրովը, ամփոփելով ԱՄՆ-ի պետքարտուղարի հետ երեք ժամ տևած բանակցությունների արդյունքները, նշել է, որ դրանք օգտակար էին:

«Տարաձայնությունները պահպանվում են, բայց ընդհանուր շահերից է բխում համաձայնությունների հասնելը»,- ասել է նա:

«Մենք քննարկեցինք մեծ թվով հարցեր՝ Ուկրաինայի, Իրաքի իրադրությունը, ինչպես նաև երկկողմ հարաբերությունների հարցեր, հումանիտար բնույթի մի քանի հարցեր, որոնք վերաբերում են Ռուսաստանի քաղաքացիների ճակատագրին»,- հավելել է Լավրովը: Կողմերը համաձայնել են, որ Ռուսաստանը և ԱՄՆ-ը կարող են ավելի արդյունավետորեն գործակցել ահաբեկչության դեմ մղվող պայքարում, որը, ՌԴ ԱԳ նախարարի կարծիքով, գլխավոր սպառնալիքն է դառնում Մերձավոր Արևելքի և Հյուսիսային Աֆրիկայի տարածքում: