Հիմալայներում չորս զբոսաշրջիկ է զոհվել ձնամրրիկի պատճառով

Նեպալի լեռներում սաստիկ ձնամրրիկի զոհեր են դարձել չորս զբոսաշրջիկներ, ևս 14 հոգու հաջողվել է փրկել, տեղեկացնում է «Արմենպրես»-ը՝ հղում անելով BBC-ին:

Զոհվածների թվում են երկու լեհեր, մեկ իսրայելացի և մեկ նեպալցի, հայտնել են երկրի իշխանությունները:

Հիմալայներում՝ Կատմանդուից 200 կիլոմետր հյուսիս - արևմուտք ընկած շրջանում, ձյան առատ տեղումները և մրրիկը հանկարծակիի են բերել զբոսաշրջիկներին:

Նեպալում վատ եղանակի պատճառը «Խադխադ» ցիկլոնն է, որը Հնդկաստանի արևելյան ափին մոլեգնել է մի քանի օր առաջ: Այժմ Նեպալում տուրիստական սեզոնի բարձրակետն է: