Արևմուտքի երկրներում էբոլա վիրուսի տարածումը քիչ հավանական է. ԱՀԿ

Էբոլա վիրուսով պայմանավորված հիվանդության բռնկումն Արևմուտքի երկրներում քիչ հավանական է՝ հաշվի առնելով առողջապահության կազմակերպված համակարգը: Ինչպես տեղեկացնում է «Արմենպրես»-ը, այս կարծիքը հայտնել է Առողջապահության համաշխարհային կազմակերպության (ԱՀԿ) պաշտոնական ներկայացուցիչը:

«Մենք վստահ ենք, որ հիվանդության բռնկումները Հյուսիսային Ամերիկայում և Արևմտյան Եվրոպայում, որտեղ գոյություն ունեն առողջապահության զարգացած համակարգեր, քիչ հավանական են»,- նրա խոսքը մեջբերել է բրիտանական BBC կորպորացիան:

Միևնույն ժամանակ ԱՀԿ-ի ներկայացուցիչը լուրջ անհանգստություն է հայտնել արևմտյան մի քանի երկրներում հիվանդությամբ վարակվելու առանձին դեպքերի առնչությամբ:

Ավելի վաղ ՄԱԿ-ի Անվտանգության խորհուրդը կոչ է արել նավագնացության և ավիաընկերություններին՝ շարունակել տրանսպորտային հաղորդակցությունը Էբոլա տենդի համաճարակից տուժած աֆրիկյան երկրների հետ՝ ընդսմին օգտագործելով հատուկ բժշկական ընթացակարգեր:

Անվտանգության խորհրդի անդամներն ընդգծել են, որ Էբոլա տենդի համաճարակին միջազգային հանրակցության հակազդումն այսօրվա դրությամբ արդյունավետ չէ համաճարակի մասշտաբների ու դրա հետևանքների տեսանկյունից:

Այդ կապակցությամբ նրանք կոչ են արել միջազգային հանրակցությանը՝ ինչպես առանձին պետությունների, այնպես էլ կազմակերպությունների, արագացնել և զգալիորեն ընդլայնել ֆինանսական և նյութական աջակցությունը տենդի ճիրաններում հայտնված երկրներին:

ԱՀԿ-ի տվյալներով՝ Էբոլայի զոհերի թիվն Արևմտյան Աֆրիկայի երկրներում մոտեցել է 4,5 հազարի, ևս շուրջ 9 հազար բնակիչ վարակված է: Մահվան և վարակման դեպքերի ճնշող մեծամասնությունը բաժին է ընկնում երեք երկրի՝ Լիբերիային, Գվինեային և Սիեռա Լեոնեին, հաղորդել է ՏԱՍՍ-ը: