ՄԱԿ-ը նախազգուշացրել է Էբոլայի հետ կապված պարենային ճգնաժամից

Էբոլա տենդի ներկայիս համաճարակը կարող է հանգեցնել պարենային ճգնաժամի: Ինչպես տեղեկացնում է «Արմենպրես»-ը՝ հղում անելով «Ասոշիեյթեդ պրես» գործկալությանը, այս կարծիքին են ՄԱԿ-ում և ոչ պետական հումանիտար կազմակերպություններում:

Համաշխարհային պարենային ճգնաժամ կարող է սկսվել այն դեպքում, եթե առաջիկա ամիսներին համաճարակը տարածվի ավելի արագ տեմպերով:

Ներկայում ՄԱԿ-ի Պարենի համաշխարհային ծրագիրը շուրջ 530 հազար մարդու է մթերքով ապահովել այն երկրներում, որոնք առավել շատ են տուժել Էբոլայից, իսկ մինչև հոկտեմբերի վերջն ակնկալում է մթերքով ապահովել ևս 600-700 հազար մարդու: Ի վերջո կազմակերպությունում հույս ունեն պարենամթերքով ապահովել մինչև 1,3 միլիոն մարդու:

Պարենի համաշխարհային ծրագրի ներկայացուցիչների ջանքերը հիմնականում ուղղված են Լիբերիային, Սիեռա Լեոնեին և Գվինեային օգնություն ցուցաբերելուն, երկրներ, որոնք առավել շատ են տուժել Էբոլա տենդից: Մասնավորապես, ՄԱԿ-ը մթերքներ է հասցնում այն կենտրոններին, որտեղ պահում են Էբոլայով հիվանդներին, ինչպես նաև այն բնակավայրերին, որտեղ սահմանված է կարանտինի ռեժիմ:

ՄԱԿ-ը պարզել է, որ տենդի ճիրաններում հայտնված երկրների շատ շրջաններում մարդիկ ստիպված են կրճատել օգտագործվող կերակրի քանակը և անցնել ավելի էժան մթերքների: Բացի այդ, գյուղատնտեսական շատ հանդակներ բարձիթողի վիճակում են, ինչը պարենային իրադրության վրա ազդում է ոչ միայն Սիեռա Լեոնեում, Գվինեայում և Լիբերիայում, այլև հարևան երկրներում, քանի որ տարածաշրջանում խզված են առևտրական կապերը:

Գյուղատնտեսության զարգացման միջազգային հիմնադրամի (IFAD) նախագահ Կանայո Նվանզեն հայտարարել է, որ առևտրի ծավալն այն տարածաշրջանում, որտեղ մոլեգնում է Էբոլան, կրկնակի պակաս է, քան անցյալ տարվա համապատասխան ժամանակաշրջանում, հաղորդել է «Ինտերֆաքս»-ը: