Ուկրաինան և Եվրամիությունը կարևորել են Մինսկի համաձայնությունների կատարումը

Ուկրաինայի նախագահ Պյոտր Պորոշենկոն, Եվրախորհրդի նախագահ Հերման Վան Ռոմպեյը և Եվրահանձնաժողովի նախագահ Ժոզե Մանուել Բառոզուն Միլանում կայացած հանդիպմանը նշել են Մինսկի համաձայնությունների կատարման անհրաժեշտությունը և ընդգծել, որ Ուկրաինայի և ԵՄ-ի էներգետիկական անվտանգության հարցի լուծումը համատեղ ջանքեր է պահանջում: Այդ մասին, ինչպես տեղեկացնում է «Արմենպրես»-ը, հաղորդվում է Պորոշենկոյի կայքում:

«Զրուցակիցները համաձայնել են, որ սեպտեմբերի 5-ի Մինսկի արձանագրության և սեպտեմբերի 19-ի Մինսկի հուշագրի բոլոր կետերը պետք է անշեղորեն կատարվեն, հատկապես հրադադարի ռեժիմի պահպանումը, սահմանների նկատմամբ հսկողությունը և պատանդների ազատումը»,- ասված է հաղորդագրության մեջ:

Զրուցակիցները նաև նշել են, որ Դոնբասում ընտրությունների անցկացումը լրջորեն կհարվածի Մինսկի համաձայնություններին:

Ավելի վաղ Պորոշենկոն Միլանում հանդիպում է ունեցել Գերմանիայի կանցլեր Անգելա Մերկելի, Իտալիայի նախագահ Ջորջո Նապոլիտանոյի և Իտալիայի վարչապետ Մատեո Ռենցիի հետ:

Մասնավորապես, ինչպես նշում է ՌԻԱ «Նովոստին», Մերկելի հետ հանդիպմանը կարևորվել է ռուս-ուկրաինական սահմանում ԵԱՀԿ-ի առաքելության թվակազմի ավելացումը: Պորոշենկոն և Մերկելը նաև անհրաժեշտ են համարել Մինսկի համաձայնությունների ամբողջական կատարումը:

Ավելի վաղ Ուկրաինայի նախագահն ստորագրել է Դոնեցկի և Լուգանսկի մարզերի առանձին շրջանների հատուկ կարգավիճակի մասին օրենքը: «Օրենքով նշված տարածքներում հատուկ կարգը սահմանվում է ժամանակավորապես՝ երեք տարով»,- ասված է պետության ղեկավարի կայքում զետեղված հաղորդագրության մեջ:

Նշվում է, որ օրենքի հիմնական նպատակը Դոնբասի իրադրության նորմալացման և բնակիչների վերադարձի համար պայմանների ստեղծումն է:

Բացի այդ պետությունը չի հետապնդելու և քրեական պատասխանատվության չի ենթարկելու զինված կարգավորումների մասնակիցներին, բացառությամբ նրանց, ովքեր կասկածվում են ծանր հանցագործություններ կատարելու մեջ: