Ներսիկ Իսպիրյանը՝ չիրագործված երազանքի, նոր տեսահոլովակի և քաղաքական գործիչ ընկերներ ունենալու մասին (լուսանկարներ, տեսանյութ)

Հարցին, թե այն նպատակը, խնդիրը, որը նա իր առջև դրել էր երգարվեստ մտնելուց առաջ, այսօր իրականացված համարո՞ւմ է, ՀՀ վաստակավոր արտիստը դրական պատասխան տվեց:

Զրույցի ընթացքում պրն. Իսպիրյանը նշեց, որ երբևէ չի փոշմանել մասնագիտության ընտրության հարցում:

Հարցին, թե ինչպիսի հայր է ինքը, Ներսիկ Իսպիրյանը նշեց. «Ավանդապաշտ, սկզբունքային, արմատական, հայեցի և հայրենասեր»:

Ներսիկ Իսպիրյանը որդու հետ

Այն հարցին էլ, թե որտե՞ղ է ամենաջերմ լսարանը՝ հայրենիքո՞ւմ, թե՞ հայրենիքի կարոտով ապրող սփյուռքում, Իսպիրյանը պատասխանեց.

«Իմ լսարանը մեկն է, ովքեր ազգային գիտակցություն ունեն, այդ խավն է լսում: Նրանք, ում համար կարևոր չէ ազգային-ապազգայինը, ուրիշ խավ են, ինձ հետ գործ չունեն»:

Զրույցի ընթացքում անդրադարձանք նաև 2015թ-ի ապրիլի 24-ին Հայոց ցեղասպանության 100-րդ տարելիցին նվիրված միջոցառում կազմակերպելուն: Ազգագրական երգի նվիրյալը նշեց, որ ցեղասպանությանը նվիրված նախագծով անպայման հանդես է գալու. «Մշակույթի նախարարի հետ խոսեցի, անպայման պետք է մեկտեղվենք, և ես իմ ծրագիրը պետք է ներկայացնեմ մեկ շաբաթ կամ տասը օր առաջ՝ նվիրված ցեղասպանությանը: Ազգային, ոգևորող մեծ համերգ է լինելու, որը նախատեսված է Հայաստանում»:

Ներսիկ Իսպիրյանի հետ խոսեցինք նաև նոր ներկայացված տեսահոլովակի, ինչպես նաև նախատեսված առաջիկա համերգների մասին:

Խոսելով նոր տեսահոլովակի մասին՝ պրն. Իսպիրյանը նշեց, որ արձագանքը դրական է եղել. «Զանգեր եմ ստացել աշխարհի հայաբնակ բոլոր վայրերից: Բոլորն էլ շատ բարձր են գնահատել՝ ուսուցողական, դաստիարակչական: Մի խոսքով՝ դրական»:

Երգիչը հավելեց նաև, որ դեկտեմբերին համերգ է նախատեսում. «Դեկտեմբերի 13-ին համերգ ենք ունենալու Սունդուկյան թատրոնում, որի ողջ հասույթը տրամադրելու ենք Մուրադ Մշեցուն, որովհետև նրա երգերը մեզ շատ հոգեհարազատ են, համահունչ են և նա մեծ ձեռագիր ունի հայրենասիրական երգարվեստում: Մտահղացումն իմն է»:

Զրույցի ընթացքում անդրադարձանք նաև հայաստանյան քաղաքական անցուդարձին: Պրն. Իսպիրյանը նշեց, որ որպես բնակիչ թեթևակի հետաքրքրվում է քաղաքականությամբ և քաղաքական գործիչ շատ ընկերներ ունի:

ՀՀ վաստակավոր արտիստի հետ հարցազրույցն ավարտեցինք բլից հարցերով և խնդրեցինք մաքսիմալ անկեղծ պատասխանել հարցերին.

-Ներսիկ Իսպիրյանն՝ իբրև մարդ, երեք բառով:

- Բարձր որակի, հարազատասեր, հայրենասեր և ընկերասեր:

- Մի բան, որը երբեք չեք ների:

- Չեմ ներում դավաճանությունը, ստախոսությունը և ոչ ճիշտ մարդկային քայլերը:

- Մեկը, ում ողջ կյանքում շնորհակալ եք:

- Ընտանիքս, ծնողներս, եղբայրներս:

- Մեկը, ումից ներողություն կխնդրեիք, բայց հնարավորություն այլևս չունեք:

- Միայն միայն ընտանիքիս մեջ: Սակայն եթե դրսում էլ զգամ մեղավոր եմ անպայման ներողություն կխնդրեմ: Սակայն այդպիսի առիթ չի եղել: Եթե մեղավոր լինեմ, անպայման ներողություն կխնդրեմ, որոհետև դա էլ է մարդկային:

- Մի բան, որի համար զղջացել եք:

- Չկա այդպիսի բան:

-Ամենածանր կորո՞ւստը:

- Հարազատի մահը և կորուսյալ հայրենիքը:

- Ամենաթանկ նվե՞րը:

- Կրկին հայրենիքը:

- Հիասթափությո՞ւնը:

- Հիասթափություն ապրել եմ, սակայն չեմ հուսահատվել:

- Չիրագործված երազա՞նքը:

- Ազատ անկախ և միացյալ Հայաստանը:

- Աստվածահավա՞տ, թե՞ աստվածավախ մարդ եք:

- Երկուսն էլ:

Զրուցեց Լիանա Թորոսյանը