Արցախը վստահում է Երկրապահին

Նոյեմբերի 12-ին ղարաբաղաադրբեջանական սահմանի արևելյան հատվածի օդային տարածքում ուսումնավարժական թռիչքի ժամանակ ադրբեջանական ԶՈՒ-ի կողմից հրադադարի ռեժիմի խախտման արդյունքում խոցվեց ԼՂՀ ՌՕՈւ ՄԻ-24 ուղղաթիռը: Չորս ազատամարտիկների մայր, Արցախի համալսարանի պրոֆեսոր Արզիկ Մխիթարյանը, անդրադառնալով թշնամու անհանդուրժողականությանը, Lurer.com-ի թղթակցի հետ զրույցում ասաց.

«Արցախի վրա նորից անհաջողությունը կախվեց: Կայծակեց լուրն այն մասին, որ ստոր ցինիզմով հակառակորդը զորավարժություն կատարող ռազմական մեր ուղղաթիռն է վնասել: Բոլորս ցնցված էինք. նրանք կոշտ ու անհաշտ են նույնիսկ այն դեպքերում, երբ իրենց որևէ վտանգ չի սպառնում:

Նորից ու նորից համոզվում ես, որ բորենու բերանն ինչքան էլ ձիթենու ճյուղ դնես, խաղաղության աղավնի չի դառնա:

Հաշված ժամեր անց համացանցի բազում կայքերում հայտնվեց Մեծ Զորավարի՝ Գեներալ Մանվել Գրիգորյանի հայտարարությունը, որով ցավակցություն էր հայտնում զոհերի հարազատներին և հուժկու ուղերձ հղում արցախցիներին ու ողջ հայությանը: Համայն հայության մեջ մեծ համարում ունեցող Երկրապահը հայտարարեց, որ կանգնած է սադրանքի գնացող հակառակորդին դեմ հանդիման, թույլ չի տա նորից վտանգել հայության ճակատագիրը և, դեռ ավելին, ռազմական գործողություների նոր թատերաբեմ կդարձնի Բաքուն:

Պաշտպանվածության, հպարտության և երախտագիտության հախուռն զգացումները միայն դող ու սարսուռ են դառնում երակներիդ ու մարմնիդ բոլոր բջիջներում:

Կեցցե’ս, հայ ազգի լեգենդար Զորավար, Աստված թող բազմապատկի բազկիդ ուժը, որը նախնիներիդ՝ Դավիթի, Մհերի խենթության կերպն ունի…

Վտանգված նույն երկնակամարով Ղարաբաղ ժամանեց ՀՀ Նախագահը, ում հայտնվելը ուղղաթիռի դռների մեջ հավաստեց մի հզոր ճշմարտություն՝ պատերազմի դաժան ճանապարհն անցած զորահրամանատարը և երկրի թագավորը, ժողովրդի մեջքին կանգնած, պետության անվտանգության երաշխավոր են:

Ոչ մի արցախցի չէր կասկածում, որ հայկական բանակն իր նվիրվածությամբ պահապանն է մեր երկրի ու ազատության, սակայն կեսից ավելին արհեստավարժ դարձած երկրապահները մեկ անգամ ևս հաստատեցին, որ հայկական նվիրյալ աշխարհազորը՝ քաջազուն երկրապահ ֆիդային, հայդուկ ազատամարտիկները, երկրի թիկունքն են…

Ձեզ արևշատություն ու տոկուն կամք, մարտական ոգի ու մարդկային բարություն…

Հայոց երկնքում ճախրող արծիվներ են պետք, և այդ դո’ւք եք, սիրելի’ երկրապահներ …

Մհերյան ձեր բազկին՝ զորություն…»: