Ռուսաստանը չի խախտել միջազգային իրավունքը Ղրիմում. Պուտին

Ռուսաստանի նախագահ Վլադիմիր Պուտինը Ղրիմի՝ անեքսիայի ենթարկվելու վերաբերյալ Արևմուտքի արձագանքը համարում է «ոչ ադեկվատ»: Այս մասին հայտնել է Deutsche Welle-ը՝ հղում անելով Պուտինի գերմանական ARD հեռուստաալիքին տված բացառիկ հարցազրույցը:

«Երբ մենք լսում ենք այն մասին, որ Ռուսաստանը խախտել է միջազգային իրավունքը, ապա ոչինչ, բացի զարմանքից, ինձ մոտ դա չի առաջացնում: Ոչինչ բացի այն բանից, ինչն արվել է Կոսովոյում, Ղրիմում չի արվել»,- նշել է Պուտինը՝ մեջբերելով Կոսովոյի նախադեպը:

ՌԴ նախագահի խոսքով՝ Կոսովոյի հարցով Միջազգային դատարանի որոշման մեջ կա հստակ կանոն՝ «ինքնորոշման հարցի որոշման դեպքում ժողովուրդը, որն ապրում է որոշակի տարածքում, պարտավոր չէ հարցնել իր պետության կենտրոնական իշխանությունների կարծիքը»։

Պուտինը նշել է, որ, ի տարբերություն Կոսովոյի, որտեղ անկախության մասին որոշումը կայացրել է միայն խորհրդարանը, Ղրիմում այդ հարցը որոշվել է հանրաքվեի միջոցով։

Թեև ՌԴ նախագահն ընդունել է, որ հանրաքվեի անցկացման պահին Ղրիմում եղել են ռուսական զորքեր, նա նշել է, թե «խորապես վստահ է, որ միջազգային իրավունքի ոչ մի խախտում Ռուսաստանը թույլ չի տվել»։

«Մեր զինված ուժերն արգելափակել են Ուկրաինայի զինված ուժերը, որոնք տեղակայված էին եղել Ղրիմում: Սակայն ոչ թե ստիպելու ենք որևէ մեկին գնալ քվեարկության, դա անհնար է, այլ այն բանի համար, որպեսզի արյունահեղություն չլինի, որպեսզի մարդկանց հնարավորություն տրվի արտահայտել իրենց վերաբերմունքը հարցի շուրջ, թե ինչպես են իրենք ցանկանում տեսնել իրենց ապագան և իրենց երեխաների ապագան»,- ասել է Վլադիմիր Պուտինը: