«Ֆուկուսիմա-1»-ի ճառագայթաակտիվ արտանետումները հասել են Կալիֆոռնիայի ափեր

Ամերիկացի գիտնականները հայտարարել են, որ Ճապոնիայի «Ֆուկուսիմա-1» վթարային ատոմակայանի կողմից արտանետվող ցեզիում-134 ճառագայթաակտիվ տարրի հետքեր են հայտնաբերվել Խաղաղ օվկիանոսի ջրերում՝ Կալիֆոռնիայի հյուսիսային ափերի մոտ: Այդ մասին, ինչպես տեղեկացնում է «Արմենպրես»-ը, հաղորդել է The Japan News-ը՝ վկայակոչելով Ճապոնիայի «Ձիձի պրես» գործակալությունը:

Ճառագայթաակտիվ նյութը հայտնաբերել են այն ջրում, որի նմուշն այս տարվա օգոստոսին վերցվել էր Յուրիկա քաղաքից 150 կիլոմետր հեռավորության վրա, պնդում են Վուդս Հոլ օվկիանագրական ինստիտուտի գիտնականները:

Սա առաջին դեպքն է, երբ Ճապոնիայի վնասված ատոմակայանից ճառագայթաակտիվ նյութ է հայտնաբերվել ԱՄՆ-ի տարածքային ջրերում, նշել է հրատարակությունը:

«Ֆուկուսիմա-1» ատոմակայանի վթարը տեղի է ունեցել 2011 թվականի մարտի 11-ին Ճապոնիայի հյուսիս - արևելքում 9 մագնիտուդով երկրաշարժից հետո, հաղորդել է ՌԻԱ Նովոստի գործակալությունը: