«Ռուսաստանը և Իրանը համանման դիրքորոշումներ ունեն տարածաշրջանային ու գլոբալ հարցերում». Նարիշկին

Ռուսաստանը և Իրանը նման կամ համընկնող դիրքորոշումներ ունեն տարածաշրջանային և գլոբալ հարցերի մեծ մասի նկատմամբ: Այդ մասին, ինչպես տեղեկացնում է «Արմենպրես»-ը, Պետդումայի նախագահ Սերգեյ Նարիշկինը հայտարարել է իրանական Մեջլիսի (խորհրդարան) խոսնակ Ալի Լարիջանիի հետ Թեհրանում կայացած հանդիպման ժամանակ:

«Մենք բարձր ենք գնահատում Իրանի դերը և Իրանի քաղաքականությունը որպես տարածաշրջանային անվտանգության կարևորագույն գործոն, և այդ առումով ակնկալում ենք մեր համատեղ դիրքերի ամրապնդում, մանավանդ որ միջազգային օրակարգի թե տարածաշրջանային, թե գլոբալ հարցերի մեծ մասի նկատմամբ մենք ունենք կամ նման, կամ համընկնող դիրքորոշումներ»,-ասել է ՌԴ-ի խորհրդարանի ստորին պալատի ղեկավարը:

Նարիշկինն իր աշխատանքային այցը Թեհրան դիտում է «որպես մեր երկրների, մեր խորհրդարանների միջև քաղաքական երկխոսությունը խորացնելու ևս մեկ հնարավորություն»:

«Ռուսաստանի քաղաքական ղեկավարությունն ի դեմս Իրանի տեսնում է հուսալի, հեռանկարային գործընկերոջ, և մենք ակնկալում ենք համագործակցության ընդլայնում բոլոր բնագավառներում՝ քաղաքական, առևտրատնտեսական և, իհարկե, մեր միջխորհրդարանական շփումների ընդլայնում»,-հավելել է նա:

Ռուսաստանն Իրանի հետ համագործակցության հիանալի հեռանկարներ ունի, ընդ որում՝ գլխավոր հարցն առևտրի ընդլայնումն է երկրների միջև»: Այս կարծիքը ՏԱՍՍ-ին հայտնել է Ռուսաստանի լիբերալ դեմոկրատական կուսակցության (ՌԼԴԿ) առաջնորդ Վլադիմիր Ժիրինովսկին, որն Իրան է ժամանել Պետդումայի պատվիրակության կազմում:

Ժիրինովսկին կարևորել է Մոսկվա-Բաքու-Ջուլֆա-Աստարա միասնական երկաթուղային մայրուղու ստեղծման և մինչև Թեհրան դրա շարունակման նախագծի իրացումը: Նոր մայրուղին կոչված է նվազեցնել Եվրոպայից Ասիա և հակառակ ուղղությամբ բեռները հասցնելու ժամկետներն ու արժեքը, հաղորդել է ՏԱՍՍ-ը: