Ադրբեջանում Թուրքիայի նախկին դեսպանն առաջարկում է բացել թուրք-հայկական սահմանը

Ադրբեջանում 2001-2004 թվականներին Թուրքիայի դեսպան Ունալ Չևիքոզը կոչ է արել բացել թուրք-հայկական սահմանը:

Ինչպես հաղորդում է «Արմենպրես»-ը, թուրքական «Հուրիեթ» թերթում հրապարակած հոդվածում Չևիքոզը գրել է, որ Անկարայի և Երևանի միջև փակուղի մտած նորմալացման գործընթացը հնարավոր է, որ առաջ ընթանա միմիայն Թուքիայի կողմից «նոր նախաձեռնությամբ հանդես գալու» դեպքում:

«Կարևոր չէ, թե ինչեր տեղի կունենան, և երկու երկրները ինչպես ոտք կդնեն 2015 թվական: Պարզ է, որ այդ ժամկետը ճանապարհի վերջը չէ: Կարևորն այն է, որ Թուրքիան և Հայաստանը որոշեն, թե ինչպիսին է լինելու իրենց հարաբերություններն այդ ժամկետից հետո: Խաղի կանոնները փոփոխող նոր իրավիճակ է անհրաժեշտ», -նշել է նա:

Չևիքոզի կարծիքով` Կովկասում առաջատար դերը վերականգնելու համար Թուրքիան պետք է հանդես գա փակուղային վիճակից դուրս գալուն օգնող նոր նախաձեռնությամբ: Ըստ նրա` դրա միակ ճանապարհը Հայաստանի հետ սահմանները բացելն ու տարածաշրջանում իրավիճակի վրա դրա ազդեցության ստուգումն է:

«Ընդդիմախոսներն ասում են, որ Հայաստանի հետ փակ սահմանները Ղարաբաղի հարցում Հայաստանի վրա Թուրքիայի ճնշումն է: Սակայն, ինչ՞ ճնշման գործիք է դա, եթե 20 տարում չի կարողացել Հայաստանին հարկադրել համաձայնության գալ Ադրբեջանի հետ»,-հարցնում է նախկին դիվանագետը:

Նրա կարծիքով` բաց սահմանները մեծ օգուտ կբերեն Հայաստանին, ինչն էլ լուրջ ճնշման լծակ է հանդիսանալու: «Աստիճանաբար բացելով սահմանները` Թուրքիան կարող է իր հարևաններին խանդավառել նոր բանակցությունների: Իսկ հետո, գնահատելով ղարաբաղյան գործընթացում ձեռք բերված առաջընթացը, ավելի ֆունկցիոնալ գործիքի կվերածի սահմանի հարցը», -նշում է նա:

Չևիքոզը գտնում է, որ Թուրքիան պետք է Հարավային Կովկասում բոլոր խաղացողներին «հավասար մոտենա» և այդ ճանապարհով ձևավորի իր արդարացի միջնորդ լինելու հեղինակությունը:

«Հասել է տարածաշրջանում Թուրքիայի կարևորությունը ցուցադրելու ժամանակը: Եթե Թուրքիան նման վճռականություն ցուցաբերի, Հայաստանն ու Ադրբեջանը ևս կարող են շարունակել նրա ճանապարհը», -համոզմունք է հայտնել նա:

Ադրբեջանում դեսպանի ժամկետը լրանալուց հետո Ունալ Չևիքոզը Թուրքիայի ԱԳՆ-ում նշանակվել է վարչության պետ: 2007-2010 թվականներին նա եղել է Թուրքիայի ԱԳՆ քաղաքական ծրագրավորման տնօրեն: