Գառնու դիտարանում ավարտվել են դեֆորմոգրաֆի վերագործարկման աշխատանքները

ՀՀ ԱԻ նախարար Արմեն Երիցյանի գլխավորությամբ կայացել է ՀՀ արտակարգ իրավիճակների նախարարության հերթական ամենշաբաթյա խորհրդակցությունը, որին մասնակցել են նախարարության կառուցվածքային և առանձնացված բոլոր ստորաբաժանումների ղեկավարները:

ՓԾ տնօրեն, փ/ծ գեներալ-լեյտենանտ Սերգեյ Ազարյանը զեկուցել է շաբաթվա ընթացքում գրանցված պատահարների, ընթացիկ աշխատանքների և այս շաբաթ իրականացվելիք հրամանատարաշտաբային ուսումնավարժանքի վերաբերյալ:

Իր զեկույցում Սերգեյ Ազարյանն անդրադարձել է նաև նոյեմբերի 10-ին Երևան-Գյումրի ավտոճանապարհի ողբերգական պատահարի վերաբերյալ իրականացվող ընթացիկ աշխատանքներին: Փրկարար ծառայության տնօրենը հայտնել է նաև արտակարգ իրավիճակներում հանրային իրազեկման ոլորտում բարեփոխումների ծրագրի շրջանակներում Տավուշի մարզի 21 գյուղերում նախարարության աշխատակիցների կողմից կատարված ուսումնասիրությունների մասին, որոնց նպատակն է տեղում ազդարարման արդիականացված համակարգի պիլոտային նմուշի տեղադրումը՝ հետագայում ազդարարման ողջ համակարգն արդիականացնե լու համար: Այս արդիականացումը թույլ կտա արտակարգ իրավիճակներում հեռուստատեսության միջոցով բնակչությանն անմիջապես տեղեկացնել խոշոր աղետների մասին:

Սեյսմիկ պաշտպանության ծառայության պետը նշել է, որ ռուս գործընկերների աջակցությամբ Գառնիի դիտարանում ավարտվել են դեֆորմոգրաֆի վերագործարկման աշխատանքները:

ՓԾ քաղաքացիական պաշտպանության վարչության պետը զեկուցել է Տավուշի մարզի սահմանամերձ համայնքներում կատարված աշխատանքների մասին: Ավարտվել են համայնքների դպրոցների և մանկապարտեզների նկուղների մաքրման և վերանորոգման աշխատանքները, և վերջիններս արդեն պիտանի են պատսպարման համար, բացի այդ երեխաների համար դասընթացներ են իրականացվել արտակարգ իրավիճակներում ճիշտ վարքագիծ դրսևորելու վերաբերյալ: Գնդապետ Ներսիսյանը տեղեկացրել է նաև, որ Տավուշի սահմանամերձ գյուղերում ավարտին են հասցվել նաև դեպի դպրոց տանող ճանապարհների պատսպարման աշխատանքները, ինչի արդյունքում երեխաները պաշտպանված կլինեն թշնամու կրակոցներից:

ԱՌՆԱՊ հիմնադրամի տնօրենի տեղակալը նախարար Երիցյանին է փոխանցել «Save the children» և «Ունիսոն» կազմակերպությունների շնորհակալական պատվոգիրը ֆիզիկական սահմանափակ հնարավորություններ ունեցող մարդկանց աշխատանքային զբաղվածության ապահովման համար: Ընթացիկ աշխատանքների մասին զեկուցել են նաև ՓԾ մարզային փրկարարական վարչությունների պետերը:

Խորհրդակցության ավարտին ԱԻ նախարարը մասնագիտական բարձր պատրաստության, գործառնական պարտականությունների նկատմամբ դրսևորած բարեխիղճ վերևաբերմունքի, ինչպես նաև ներդրված անձնական ավանդի և ծննդյան 60-ամյակի կապակցությամբ ՀՀ ԱԻՆ «Պատվավոր աշխատակից» մեդալով է պարգևատրել ԱԻՆ պետական ռեզերվների գործակալության պետ Սերգեյ Շահինյանին: