Սեպտեմբերի 11-ի ահաբեկչական հարձակումների կազմակերպիչներից մեկը պատրաստ է նոր ցուցմունք տալ

«Ալ-Քաիդա» ահաբեկչական խմբավորման անդամ Զաքարիաս Մուսաուին, ով կազմակերպել էր ԱՄՆ-ում 2001թ. սեպտեմբերի 11-ին ինքնաթիռների առևանգումը, մտադիր է նոր ցուցմունք տալ ահաբեկչության գործի վերաբերյալ։ Այս մասին գրել է Газета.Ru-ն՝ հղում անելով Associated Press-ին:

Մասնավորապես, Մուսաուին պատրաստ է նոր տվյալներ բացահայտել ահաբեկիչների ֆինանսավորման մասին:

Մուսաուին, ով ցմահ դատապարտված է ամերիկյան բանտում խիստ մեկուսացման պայմաններում, նամակ է գրել դատարանին, որում հայտարարել է, որ Սաուդյան Արաբիայի արքայազնն իրեն ֆինանսական աջակցություն է ցուցաբերել 2001-ին, երբ ինքն ուսանել է ամառային դպրոցում և պատրաստվել ահաբեկչություններին։ Արդյունքում Մուսաուին չի հասցրել մասնակցել սեպտեմբերի 11-ի դեպքերին, քանի որ ձերբակալվել է ներգաղթյալների օրենքների խախտման պատճառով։

46-ամյա Մուսաուին պատրաստվում է նոր տեղեկություն հայտնել, որը կապացուցի Սաուդյան Արաբիայի իշխանությունների կապն ահաբեկչության կազմակերպման հետ։ Բացի այդ, նա ունի ամերիկյան իրավապահներին անհայտ տվյալներ ԱՄՆ նախկին նախագահ Բիլ Քլինթոնի հանդեպ պատրաստվելիք ահաբեկչության մասին։ Դատարանը դիմումը դրել է քննարկման, սակայն դատավորը խորհուրդ է տվել անտեսել այն։

Բազմաթիվ փորձագետների կարծիքով՝ Մուսաուին վստահության արժանի չէ, և նրա գործողությունները կարող են հուսահատ փորձեր լինել՝ ամերիկյան արդարադատության ներողամտությունը հայցելու համար։