ՄԱԿ-ի ԳԱ-ն և ԱԽ-ն ավարտել են Միջազգային դատարանի հինգ անդամների ընտրությունը

ՄԱԿ-ի Գլխավոր ասամբլեան և Անվտանգության խորհուրդն ավարտել են 2015-2023 թվականների համար Միջազգային դատարանի հինգ անդամների ընտրությունը, տեղեկացնում է «Արմենպրես»-ը: Վերջին թափուր տեղն զբաղեցրել է Ջամայկայի ներկայացուցիչ Պատրիկ Լիպտոն Ռոբինսոնը: ԱԽ-ում կայացած քվեարկության ընթացքում նրա թեկնածությունը միաձայն պաշտպանություն է ստացել այն դեպքում, երբ ԳԱ-ում նրա նշանակման օգտին արտահայտվել են համաշխարհային կազմակերպության 193 անդամ երկրներից 185-ը:

Նոյեմբերի 6-ին Միջազգային դատարանի կազմում ընտրվել էին Կիրիլ Գևորգյանը (Ռուսաստան), Ջեյմս Ռիչարդ Քրոուֆորդը (Ավստրալիա), Մոհամեդ Բենունան (Մարոկո) և Ջոան Է. Դոնոհյուն (ԱՄՆ): Նրանք աշխատանքը կսկսեն փետրվարի 6-ին:

Միջազգային դատարանը հիմնվել է 1946 թվականին և ՄԱԿ-ի վեց գլխավոր մարմիններից մեկն է: Հաագայում նիստեր գումարող դատարանի իրավասության մեջ մտնում է պետությունների միջև վեճերի լուծումը և համաշխարհային կազմակերպության կառույցներին կոնսուլտատիվ եզրակացություններ ներկայացնելը: Այն բաղկացած է 15 դատավորներից, այդ թվում՝ նախագահից և փոխնախագահից, հաղորդել է ՏԱՍՍ-ը: