Թուրքիան պաշտպանում է Ասադի տապալումը. Չավուշօղլու

Թուրքիայի արտաքին գործերի նախարար Մյովլուդ Չավուշօղլուն հայտարարել է, որ պաշտոնական Անկարան կողմ է Սիրիայի նախագահ Բաշար Ասադի վարչակարգի տապալմանը: Այս մասին, ինչպես հաղորդում է «Արմենպրես»-ը, հայտնում է «Անատոլու» լրատվական գործակալությունը:

«Մենք չենք կասկածում Ասադի տապալմանը»,- ասել է Չավուշօղլուն' Թուրքիայի հանրային հեռուստատեսությանը տված հարցազրույցում:

Չավուշօղլուն ասել է, որ Սիրիայի ճգնաժամի հարցում Ասադի հեռանալու անհրաժեշտության վերաբերյալ Թուրքիայի և ԱՄՆ-ի միջև տեսակետների տարբերություն չկա, կա միայն կատարվելիք քայլերի հետ կապված տարբեր մոտեցումներ: Չավուշօղլուն նշել է, որ «Ասադին տապալելու գծով հստակ քաղաքականություն դեռևս գոյություն չունի»:

Նա հավելել է, որ ԱՄՆ-ն տատանվում է Սիրիայում ցամաքային ռազմական գործողություն անցկացնելու հարցում:

Մի շարք դաշնակից երկրների' այդ թվում արաբական, աջակցությամբ ԱՄՆ-ը սեպտեմբերի 23-ին ավիահարվածներ է սկսել Սիրիայում «Իրաքի և Լևանտի իսլամական պետության» (ԻԼԻՊ) դիրքերի վրա: Օգոստոսից նման գործողություններ են անցկացվում նաև Իրաքում: Ընդ որում, ԱՄՆ-ը հարվածներ է հասցնում առանց սիրիական իշխանությունների թույլտվության: Վաշինգտոնը պաշտպանում է Սիրիայի զինված ընդդիմությանը, որը կռվում է ինչպես կառավարության, այնպես էլ ԻԼԻՊ-ի մարտիկների դեմ:

ԻԼԻՊ ահաբեկչական խմբավորումն այս տարվա ամռանը «խալիֆայություն» է հռչակել Սիրիայում և Իրաքում զավթած տարածաշրջաններում: ԻԼԻՊ-ի մարտիկների գազանային գործողությունների հետևանքով զոհվել են մի քանի հազար խաղաղ բնակիչներ, հարյուր հազարավորները փախստական են դարձել և ևս մի քանի հազար մարդ գտնվում է գերության մեջ:

Թուրքական և միջազգային ԶԼՄ-ները բազմիցս հայտնել են, որ Թուրքիան ԻԼԻՊ-ին աջակցում է ինչպես ֆինանսապես, այնպես էլ զենքով և զինամթերքով: Թուրքիան իր տարածքում կենտրոններ է բացել ԻԼԻՊ-ի շարքերում կռվելու նպատակով տարբեր երկրներից, այդ թվում' Ադրբեջանից ժամանած կամավորներին ուսուցանելու և Սիրիա ու Իրաք ուղարկելու համար: