«Ուկրաինայում ճգնաժամը կարող է խորանալ». ԵԱՀԿ-ի հատուկ ներկայացուցիչ

ԵԱՀԿ-ի նախագահի՝ Ուկրաինայի իրադրության կարգավորման հարցերով հատուկ ներկայացուցիչ, Ուկրաինա-ՌԴ-ԵԱՀԿ եռակողմ շմփան խմբի անդամ դեսպան Հայդի Տալյավինին Ուկրաինայի արևելքում շարունակվող հակամարտությունը բնութագրել է որպես վտանգավոր և տագնապահարույց, տեղեկացնում է «Արմենպրես»-ը՝ հղում անելով ՌԻԱ Նովոստիին:

«Տարածաշրջանի իրադրությունը բնավ չի բարելավվել: Մարտեր են ընթանում ՈՒկրաինայի արևելքի մի ամբողջ շարք օբյեկտներում, հատկապես Դոնեցկի օդանավակայանի շրջանում, ինչպես նաև Մարիուպոլի մատույցներում: Ոչ ոք չի կարող ասել՝ ինչ է մեզ սպասում ապագայում»,-ասել է Տալյավինին՝ նոյեմբերի 20-ին ելույթ ունենալով ԵԱՀԿ-ի Մշտական խորհրդի նիստում:

«Հաղորդումներ են ստացվում Ուկրաինայի արևելքում նոր զորակազմերի վերաբերյալ, ինչը շարունակում է մեզ անհանգստացնել: Ճգնաժամը վտանգ է ներկայացնում ամբողջ Եվրոպայի և նույնիսկ ամբողջ աշխարհի համար»,-ասել է նա:

Տալյավինին հայտարարել է, որ ճգնաժամը «կարող է խորանալ»:

ՏԱՍՍ-ի փոխանցմամբ՝ նա նաև նշել է, որ Ուկրաինայի արևելքում հակամարտության հետևանքով զոհվել է ավելի քան 4 հազար մարդ: «Զոհվել է ավելի քան 4 հազար մարդ, 10 հազար հոգի վերքեր են ստացել, հարյուր հազարավոր մարդիկ հարկադրված են եղել հեռանալ տարածաշրջանից»,-ասել է նա: Դրա հետ մեկտեղ Տալյավինին հայտարարել է, որ Շփման խմբի Մինսկի պայմանավորվածությունները թույլ են տվել խուսափել լայնածավալ ռազմական գործողություններից:

«Զինադադարի հաստատման պահից արդեն մարտեր չեն մղվում, բացի սահմանափակ թվով բնակավայրերից, լայնածավալ ռազմական գործողություններ չեն եղել»,-ասել է նա:

«Ես չեմ կարող համաձայնել այն հայտարարություններին, թե կրակի դադարեցման ռեժիմը չի կայացել, դա միակ համաձայնագիրն է, որն ամրապնդում է խաղաղ գործընթացը»,-հավելել է Տալյավինին:

ԵԱՀԿ-ում Ուկրաինայի արևելքի իրադրության խաղաղ կարգավորման այլընտրանք չեն տեսնում: «Համոզված ենք, որ հակամարտությունն անկարելի է լուծել ռազմական միջոցներով, խաղաղ կարգավորումն այլընտրանք չունի»,-նշել է Տալյավինին:

ԵԱՀԿ-ի հատուկ ներկայացուցիչը կոչ է արել կարգավորել համապարփակ քաղաքական երկխոսությունը Ուկրաինայի արևելքի իրադրության կարգավորման շուրջ: