Դոնբասում ավելի քան 700 մարդ է սպանվել զինադադարի սկսվելուց հետո. ՄԱԿ

Ուկրաինայի արևելքում ավելի քան 700 մարդ է զոհվել հրադադարի հայտարարվելուց հետո: Այդ մասին, ինչպես տեղեկացնում է «Արմենպրես»-ը, ասված է ՄԱԿ-ի Մարդու իրավունքների գերագույն կոմիսարի վարչության մոնիթորինգային պատվիրակության յոթերորդ զեկույցում, որը նվիրված է Ուկրաինայի իրադրությանը և որն ընդգրկում է սեպտեմբերի 17-ից մինչև հոկտեմբերի 31-ն ընկած ժամանակահատվածը:

«Հրադադարի սկսվելուց ի վեր սեպտեմբերի 6-ից մինչև հոկտեմբերի 31-ն ընկած ժամանակահատվածում զոհվել է առնվազն 718 մարդ: Նրանց թվում առնվազն 84 կին սպանվել է Դոնեցկի մարզում անհամամասնական ռմբակոծումների ընթացքում: Սեպտեմբերի 9-ից մինչև հոկտեմբերի 28-ն ընկած ժամանակահատվածում Դոնեցկի և Լուգանսկի մարզերում սպանված երեխաների թիվն ավելացել է 28 տոկոսով՝ 28-ից մինչև 36 մահ: Մինչդեռ երեխաների շրջանում վիրավորների քանակն ավելացել է 82 տոկոսով՝ 56-ից մինչև 102 դեպք»,- նշված է փաստաթղթում, հաղորդել է ՌԻԱ Նովոստին: