Իրանը և «վեցյակը» խստացնում են բանակցային գործընթացի գաղտնիությունը

Իրանը և «վեցյակը» (ՄԱԿ-ի Անվտանգության խորհրդի հինգ մշտական անդամները և Գերմանիան) խստացնում են բանակցային գործընթացի գաղտնիությունը: Այդ մասին, ինչպես տեղեկացնում է «Արմենպրես»-ը, ՏԱՍՍ-ին հայտնել է իրազեկված մի աղբյուր:

«Վիեննայի բանակցային փուլի մասնակիցները պայմանավորվել են առավելագույնս պահպանել մեդիական լռությունը և չհրապարակել բանակցային գործընթացի տեխնիկական մանրամասները»,-ասել է նա: Մամուլն աշխատում է հատուկ ժամանակավոր տաղավարում, որը տեղակայված է «Քոբուրգ» հյուրանոցի առջև, որտեղ ընթանում են բանակցութունները:

Բանակցությունների ներկա փուլում օրվա ընթացքում բրիֆինգներ նախատեսված չեն: Մամուլի ներկայացուցիչները աղբյուրների հետ շփվում են հիմնականում Էլեկտրոնային կապի միջոցով կամ, հնարավորության դեպքում, հյուրանոցի մուտքի առջև:

Ինչպես ՏԱՍՍ-ին հայտնել է իրանական պատվիրակության մի աղբյուր, «բանակցություններն ընթանում են լուրջ մթնոլորտում, դրանք ինտենսիվ են, բայց դանդաղ են առաջ շարժվում, կողմերը փորձում են լուծել մնացած հարցերը, և ներկայում ամեն ինչ պտտվում է Թեհրանի նկատմամբ սահմանված պատժամիջոցների և Իսլամական Հանրապետության կողմից ուրանի հարստացման ծրագրի շուրջը»:

Աղբյուրի խոսքով՝ ԱՄՆ-ի պետքարտուղար Ջոն Քերիի այցը Վիեննա, «հնարավոր է՝ օգնի առաջ շարժվելու այս կամ այն հարցի լուծման մեջ»:

«Այժմ շարունակվում են փորձագետների երկկողմ հանդիպումները: Կողմերն ուշադիր վերլուծում են զանազան տեխնիկական մանրամասներ»,-հավելել է զրուցակիցը: