Արևելյան գործընկերությունում պատժել են Ադրբեջանի պատվիրակությանը

Արևելյան գործընկերության քաղաքացիական հասարակության ֆորումի ղեկավարությունը 25 հոգանոց ադրբեջանական պատվիրակությանը զրկել է Ադրբեջանի ազգային պլատֆորմից կառույցի ղեկավար կազմում ներկայացուցիչ ընտրելու ձայնի իրավունքից:

Այս մասին, ինչպես հաղորդում է «Արմենպրես»-ը, հայտնում է «Ազադլըգ» թերթը' նշելով, որ դա կապված է այս օրերին Բաթումում ընթացող Ֆորումում ադրբեջանական պատվիրակության անդամների կողմից չեխական պատվիրակության պատրաստած ստենդը պատռելու աղմկահարույց սկանդալի հետ:

Ֆորումի ղեկավարությունն այդ առնչությամբ տարածած բողոքի հայտարարության մեջ դատապարտել է ադրբեջանական պատվիրակության այդ խայտառակ արարքը: Հայտարարության մեջ նշվում է, որ Ֆորումի վարչական խորհուրդը կառույցի Կանոնադրության 6-րդ հոդվածի համաձայն (կազմակերպության հեղինակությանը սպառնացող կամ էլ լորջորեն վնասող գործողություններ), Ադրբեջանի ներկայացուցչական պատվիրակության անդամ Սալիմ Բաբաևին, ով պատռել էր չեխական պատվիրակության պաստառը, որոշում է ընդունել զրկել նրան անդամությունից:

Հայտարարության հեղինակները հերքել են ադրբեջանական կողմի տարածած լուրերն այն մասին, թե իբր սկանդալի պատճառ դարձած միջադեպը կազմակերպվել էր Ֆորումի վարչական խորհրդի անդամ Բորիս Նավասարդյանի կողմից: Նրանք նշել են, որ ադրբեջանական կողմի տարածած լուրերը սուտ են և հավելել, որ ադրբեջանական կողմը միևնույն ժամանակ ստահոդ, շինծու, վարկաբեկող տեղեկություններ է տարածել People in Need կազմակերպության անդամ, Ֆորումի վարչական խորհրդի անդամ Իվանա Սկալովանի մասին:

Կառույցի վարչական խորհուրդը հայտարարել է, որ Ադրբեջանի ներկայացուցչական պատվիրակության 25 անդամներից 20-ը, որոնք բոյկոտել են Ֆորումի աշխատանքները, զրկվել են Ասամբլեայի անդամության մանդատներից, ինչն էլ նշանակում է, որ նրանք կորցրել են նաև Ադրբեջանի ազգային պլատֆորմից կառույցի ղեկավար անդամ ընտրելու ձայնի իրավունքից:

Բաթումում Արևելյան գործընկերության ծրագրի շրջանակում ընթացող Քաղաքացիական հասարակության ֆորումում պոկել են չեխական People in Need կազմակերպության կողմից կախված պաստառը, որը քննադատություն է բովանդակել Ադրբեջանի և նրա նախագահ Իլհամ Ալիևի հասցեին:

Պաստառը, որն Ալիևի լուսանկարներով գրավոր հայտարարություն էր Ադրբեջանում մարդու իրավունքների խախտումների, իրավապաշտպանների ձերբակալության, Ալիևի կողմից անկախ ոչ կառավարական կազմակերպությունների գործունեությունը սահմանափակելու մասին օրենք ստորագրվելու մասին, պոկել է ադրբեջանական պատվիրակության անդամ Սալիմ Բաբաևը, որից հետո Չեխիայի ներկայացուցիչները ոստիկանություն են կանչել:

Ֆորումին մասնակից «Ենի Մուսավաթ» թերթի գլխավոր խմբագիր Ռաուֆ Արիֆօղլուն ադրբեջանական musavat.com-ին հայտնել էր, որ ադրբեջանական պատվիրակությունը հրաժարվել է մասնակցել ֆորումի աշխատանքներին' պատճառաբանելով ֆա այն բանով, որ մարդու իրավունքները խախտվում են նաև մյուս երկրներում, սակայն, կախվել են հենց Ադրբեջանին քննադատող լուսանկարներ: