Ստրասբուրգում մեկնարկում է Եվրախորհրդարանի լիագումար նստաշրջանը

Ստրասբուրգում մեկնարկում է Եվրախորհրդարանի լիագումար նստաշրջանը: Ինչպես տեղեկացնում է «Արմենպրես»-ը, պատգամավորների կողմից քննարկվելիք գլխավոր թեմաների թվում են Եվրահանձնաժողովին անվստահության քվե հայտնելը և Պաղեստինի Պետության ճանաչումը: Խորհրդարանականների առջև ելույթ կունենա նաև Հռոմի Ֆրանցիսկոս պապը:

Եվրահանձնաժողովին անվստահության քվե հայտնելու առաջարկը քննարկվել է նոյեմբերի 24-ին: ԵԽ-ն լիազորություններ չունի պաշտոնանկ անելու եվրակոմիսարներից որևէ մեկին կամ միայն ԵՀ-ի նախագահին: Ուստի հարվածի տակ է հայտնվել 28 անդամից բաղկացած ամբողջ թիմը, ըստ էության, եվրոպական կառավարությունը, որն աշխատանքի է ձեռնամուխ եղել նոյեմբերի 1-ին, թեև ժողովրդական ընտրյալների պահանջները գլխավորապես հասցեագրված են ԵՀ-ի նախագահ Ժան Կլոդ Յունկերին:

Նոյեմբերի սկզբին Լրագրողական հետաքննության միջազգային կոնսորցիումը հայտարարել է, որ Լյուքսեմբուրգը գաղտնի համաձայնագրեր է կնքել 340 խոշորագույն կորպորացիաների հետ՝ նրանց հնարավորություն ընձեռելով ավելի քիչ հարկեր վճարել միջազգային և ազգային օրենսդրության մեջ առկա խնդիրների շնորհիվ:

Յունկերը, որը 1995-ից մինչև 2013 թվականը զբաղեցնում էր Լյուքսեմբուրգի վարչապետի պաշտոնը, և դրան զուգահեռ 1989-ից մինչև 2009 թվականը ղեկավարում էր Մեծ դքսության ֆինանսների նախարարությունը, հերքել է մեղսակցությունը հարկային մեքենայությունների հետ կապված սկանդալին, որն ստացել է «ԼյուքսԼիքս» անվանումը: «Ամեն ինչ արվել է Լյուքսեմբուրգի ազգային օրենսդրական նորմերին և այդ բնագավառում միջազգային նորմերին համապատասխան»,- հավաստիացրել է նա:

Նույն օրը Եվրախորհրդարանում ելույթ կունենա ԵՄ-ի արտաքին գործերի և անվտանգության քաղաքականության գերագույն ներկայացուցիչ Ֆեդերիկա Մոգերինին: Քննարկումը նվիրված կլինի Պաղեստինի Պետության ճանաչման հարցին: Հինգշաբթի օրը կատարման համար ոչ պարտադիր համապատասխան բանաձևը կդրվի խորհրդարանականների քվեարկությանը: Նախաձեռնության հեղինակները՝ ձախ խմբակցությունները, առաջարկել են ճանաչել Պաղեստինը «1967 թվականի սահմաններով Երուսաղեմ մայրաքաղաքով», սակայն առայժմ դժվար է ասել, թե կպահպանվի արդյոք այդ ձևակերպումը փաստաթղթի ամփոփիչ հ ամատեղ նախագծում:

«Ես ուրախ կլինեմ, եթե իմ մանդատի ընթացքում Պաղեստինյան Պետությունն սկսի իր գոյությունը»,- հայտարարել է Մոգերինին ավելի վաղ Եվրոպայի հինգ օրաթերթերի տված հարցազրույցում:

Եվրախորհրդարանի ընթացիկ նստաշրջանը կավարտվի նոյեմբերի 27-ին, հաղորդել է ՏԱՍՍ-ը: