Իտալիան կոռուպցիոն կասկածներ ունի ադրբեջանական TAP գազային նախագծում

Աշխարհ 24 Նոյեմբեր, 2014 20:44

Իտալիայում նոր խոչընդոտներ են ի հայտ եկել ադրբեջանական գազը Եվրոպա փոխադրելու համար անցկացվելիք Անդրադրիատիկ գազային խողովակաշարի (TAP) դեմ: Այս մասին, ինչպես հաղորդում է «Արմենպրես»-ը, հայտնում է virtualaz.org լրատվական կայքը` հղում կատարելով իտալական ԶԼՄ-ներին:

Ադրբեջանական կայքը հայտնում է, որ Իտալիայի իրավապահ մարմինները կասկածներ ունեն, որ Միջերկրական ծովի ափերից ցամաք դուրս եկող գազատարի մինչև Մելանդունյո շրջան անցկացվելիք 8 կմ-ոց հատվածի համար հողային տարածքների առևտրում կոռուպցիա և խարդախություն է տեղի ունեցել: Արդյունքում Իտալիայի դատախազությունը և ֆինանսական ոստիկանությունն այդ առնչությամբ հետաքննություն են սկսել:

Միջերկրական ծովի ափերին գտնվող իտալական Սելանտո շրջանի բնակիչներն ավելի վաղ բողոք էին հայտնել, որ TAP խողովակաշարի անցկացումը վնաս է հասցնելու իրենց ձիթապտղի այգիներին և շրջակա միջավայրին և պահանջել էին այդ տարածքով գազատար չանցկացնել: TAP-ի դեմ այդ արշավը գլխավորել էր Իտալիայի խորհրդարանում 23 տոկոս պատգամավորներ ունեցող «Հինգ աստղ շարժում»-ը: Չնայած Իտալիայի կառավարությունը հաստատել էր TAP-ի նախագիծը, սակայն, դեռևս ոչ մի աշխատանք այդ ուղղությամբ չի սկսել իրագործել: Տեղի բնակիչները հայտարարել են, որ շարունակելու են նախագծի դեմ բողոքի ակցիաները: Այժմ էլ խողովակաշարի համար հողատարածքներ գնելու հետ կապված կոռուպցիոն կասկածներ են հայտ եկել:

Կայքն ավելի վաղ հայտնել էր, որ Իտալիայում TAP-ի շուրջ ստեղծված խնդիրների պատճառով «Շահդենիզ» կոնսորցիումը փոփոխություններ է մտցրել ադրբեջանական գազը Եվրոպա հասցնելու ծրագրերում: Երեկ հայտնի էր դարձել, որ ադրբեջանական գազը Եվրոպա կհասնի ոչ թե 2019 թվականին, ինչպես նախապես ծրագրվել էր, այլ 2020 թվականին:

Ադրբեջանական կայքը հայտնում է, որ TAP-ի շուրջ հետաքննությունը սկսել է Մելանդունյո նահանգի ֆինանսական ոստիկանության պետ Մացոտա Լեչեն: 46-ամյա Մացոտան փայլուն կարիերա ունի: 2004 թվականին նա գլխավորել է մաֆիայի դեմ պայքարող հետաքննչական վարչությունը և իտալական «Կոզա նոստրա»-ի դեմ մի շարք հաջող գործողություններ իրագործել:

Գնդապետ Լեչեն այդ գործողությունների շրջանակում ձերբակալել էր իտալական մաֆիայի մի շարք ճանաչված անդամների, նահանգային խորհրդի պատգամավորների և կալանք դրել նրանց ունեցվածքի վրա: Մաֆիայի դեմ վերջին գործողությունը նա անցկացրել է անցյալ տարի, որի ժամանակ ձերբակալել է «Տորնեսե» կլանի մաֆիոզ անդամ Լուիսո Վետրուգնոյին: